Tun ang huna MNF party-a la awm chu thil zahthlak a ni - Zodintluanga

Mizoram Pradesh Congress Committee (MPCC) treasurer Zodin-tluanga Ralte chuan, tun ang huna MNF party-a awm chu thil zahthlak a nih thu leh, Lunglei Municipal Council (LMC) inthlan tur chu an party-in an nghah-hlelh tawh thu a sawi.

Zodintluanga Ralte hian nimin khan a bial Thoráng huam chhunga khaw ṭhenkhatah vantlang inkhawm neiin thu a sawi a; MNF party chu an minister-te'n chakna thahruai chhetê an la neih leh sum hmanga lei tur zawn mai loh chu tih theih an nei tawh lo nia sawiin, "An tihhlawhtlin loh tur chiang sa tiam kawngah tluk ngaihna an awm lo a, anni hian Lunglei mipui hi min hmangaih tak tak lo. Tun ang huna MNF party-a la awm chu thil zahthlak a ni," a ti.

Tun hnaia MNF President-in LMC inthlang turah boruak siam tuma Lunglei a tlawh ṭumin Lunglei mipui tan thu dik leh rintlak sawi loin a haw leh nia sawiin Zodintluanga chuan, "Minister vote thlakna huam chhunga feh kawng bote an awm tawh lohna turin Lunglei mipui kan fimkhur hle a ngai dawn a ni," a ti a; Lunglei mipuiin LMC-ah MNF an chaktir dawn lo niin a sawi.

ZPM chungchang sawiin Zodintluanga chuan, Mizoram khaw hrang hrangah bél ruak ring takin an vaw ri mek niin a sawi a, kalphung thar an tih chu ZPM mi leh sate ngei pawhin sawi chhâwn ngaihna an hre lo niin a sawi bawk.