LMC inthlan turah candidate nei ṭha berah ZPM an inchhál

ZPM party chuan nimin khan an pisaah Friday Political Session neiin an inkhawm a; thusawitu Lalmuanpuia Punte, general secretary chuan, Lunglei Municipal Council inthlan turah ZPM-in candidate an nei ṭha ber niin a sawi.

Lalmuanpuia Punte chuan, ZPM chu LMC inthlan atan an inbuatsaihna a rei tawh nia sawiin, "Lunglei khawpuiin khawpui inrêlbàwlna ṭha, bul ṭanna ṭha tak a neih theih nan ZPM chuan theihtawp a chhuah. LMC election-ah hian ZPM chu candidate nei ṭha ber party kan ni a, ruling party MNF-in candidate an tifel har ber," a ti.

Lungleiah ZPM boruak a ṭha nia sawiin Lalmuanpuia chuan, "LMC inthlanah sorkarna siam theih ngei kan inbeisei hle. Kan candidate-te'n party dangte thlêmna îtawm tak an tâwk chungin Lunglei hmasawnna duh vangin ZPM candidate ni chunga an ding nghet tlat hi an chhuanawm kan ti," an ti a, an duhthlan-naah kalphung thar a lan thu a sawi.