MPCC-in 'Politics ṭha' an zirho; "MLA-te'n intuaihriam an mamawh" - Vanneihtluanga

Mizoram Pradesh Congress Committee (MPCC) chuan nimin khan Congress Bhavan-ah Friday Political Session neiin, 'Politics ṭha' tih an zirho a, Lengzem editor Vanneihtluanga’n thupui a sawi.

Vanneihtluanga chuan, "Ram rorelna hmuna budget session-ah sawiho huna sawi tur hre lo ram hruaitu duh aia tam kan nei a, mipui aiawh MLA-te'n hriatna leh thiamna lamah intuaihriam an mamawh," a ti.

Sorkar inrêlbàwlna dik a pawimawh thu sawiin Vanneihtluanga chuan, "Dâwt project hmangin central kan dàwr a, Mizoram thlenpui rual rualin duh duha hman theih emaw kan ti. Kan data dik lo theh thlak ṭhin kan tuar a ni. Dan bihrûksan leh pehhêl thiamna hi finna ni tlata kan ngaih avangin smuggling mantu tur hi smuggler karah bihrûk a ngaih hun a thleng thei," a ti a; 'Tling ila, vote hmu teuh ila, chak ila, rorel ila,' tih ngaihtuahna paih a hun tawh thu a sawi.

Vanneihtluanga chuan, inthlan dawna intih 'fit' thar vak a ṭul lo tih sawiin, "Fit tluan chhuak mi kan mamawh tawh zawk. Upa zawkte hriatna leh thiamna neih lêt nei tur leh rin ngam khawpa inbuatsaih si loa senior politician hnualsuat ngawt a rem lo. Senior-te pawhin kum 60 pelh tawh lamah chuan ṭangkaina bik leh eng emaw bik nih si loh chuan inthiar fihlîm nachang hriat hi Mizorama political party tin mamawh a ni. Inthiar fihlim nachang kan hriat loh a, ni ve tlata inhriatna hian ṭhalaite traffic kan ti-jam tih hriat a pawimawh," a ti.

Congress party chu Mizorama political party zingah central politics zen thûk ber an nih thu leh Mizoramah ringawt lungawi mai lo a, central-a politician lian leh lârte bula chetla phâk nih a ṭul thu a sawi bawk.

'Politics ṭha' zirhonaah hian MPCC president Lalsawta pawhin thu a sawi a, "Tuna thil ṭha leh dik tih hi mihring dam chhan a ni," a ti a; sorkar ṭha siam turin Congress a sorkar a ngaih thu a sawi a ni.