Health care scheme changtlung zawkin kalpui a ni dawn - Tawnluia

Mizoram Government Doctors’ Association (MGDA) chuan nimin khan Aijal Club-ah Annual General Conference vawi 37-na an hmang a; khuallian, deputy chief minister Tawnluia chuan, changtlung zawkin health care scheme kalpui a nih dawn thu a sawi.

MGDA inkhawmpui hi vice president Dr C Lalhrekima'n a kaihruai a; kum 2019-2023 chhunga an member zinga pension-a chhuak mi 24 thlahna leh member thi mi pasarih sûnna hun an hmang.

Deputy Chief Minister chuan, mipuiin ṭangkai zawka Mizoram Health Care Scheme an hman a duh thu sawiin, inziak lut turin mipui a sáwm a, "Asian Development Bank (ADB) loan hmangin changtlung zawka kalpui a ni dawn," a ti.

Tawnluia chuan, damdawi-in thlî leh bawlh-hlawhte mumal zawka senghawi turin Smart City Project hnuaiah sorkarin theihtawp a chhuah thu sawiin, "Hemi atan hian Aizawl Solid Waste Ma-nagement Center, Tuirialah bul ṭan mek a ni," a ti a, damdawi-in bawlhhlawh leh thlî senghawi kawngah ngaihtuahna séng a, sorkar hmalaknate puibàwm turin MGDA member-te a ngen.

Tawnluia chuan, doctor-te chu tihdam hna an koah a tlak avangin an hnathawh leh mawhphurhna chu hna dangte aiin a danglam a ni tih hria a, mi dangte rawngbawlna kawng zawh zel turin a sáwm bawk.

MGDA inkhawmpuiah hian chawhnuah MJA kaihhruaiin kum 2023-2025 chhunga office bearer turte an thlang a, president atan Dr C Lalhrekima leh general secretary Dr C Lal-chhandama bakah, OB tur dang pathum an thlang a ni.