KHAWTHLIR

LMC inthlan atan Nomination 44 a lut 
Lunglei Municipal Council inthlan, March 29, 2023-a neih turah BJP, INC, MNF leh ZPM candidate mi 44-te chuan nimin khan returning officer-te hnenah nomination paper an thehlut. Nomination paper-te chu March 13-ah endik a ni ang a, candidate-te inhnuhdawh theih hun tawp chu March 14, 2023 tlai dar 3 a ni. March 15, 2023-ah contesting candidate list tàr chhuah a ni ang.

Thisen pe
NIMAT, Aizawl chuan nimin khan Model Blood Bank, Civil Hospital, Aizawl kal chilhin thisen unit 23 an pe a, petute hmeichhia 12 leh mipa 11 an ni.

Thu la zawtfiah lo
March 5, 2023 zana police pahnih - Hav. J Lalrohlua leh Hav. Indra Kumar Rai kâp hlumtu Hav. Bimal Kanti Chakma chu police-te'n thu an la zawtfiah lo. Hav. Bimal Kanti Chakma lakah hian Vairengte Police Station-ah tualthah thubuai ziah luh a ni a, Kolasib District Jail-ah a táng mek a ni.

Meizial man
Assam Rifles chuan nimin khan Champhai Khankàwnah mi pakhat hnen aṭangin ram dang meizial dan loa lak luh báwmpui 30 an man a, Champhaia Customs hnenah an hlân. Foreign cigarette an man hi cheng nuai 45 hù a ni.

Hmeichhe dan zir
Mizoram State Commission for Women leh Mamit District Programme Office chuan nimin khan Mamit Chhimveng YMA Hall-ah 'Political Empowerment of Women and Laws Related to Women' zirhona an buatsaih. Mamit khawpuia VC member hmeichhia te, MHIP, YMA, MUP leh Primal Foundation aiawhte an tel.

Training zo
Khawzawl District Disaster Management Authority (DDMA) chuan nimin khan DC conference hall-ah ni thum chhung quick response team training an buatsaih khârna hun an hmang a, KDDMA chairman CC Lalchhuangkima, district bawrhsapin hmanpuiin, training chhuak mi paruk hnenah certificate a hlân.