Zokhawsanga insawn hun turah Assam Rifles-in thu an la dawng lo

11th March, 2023

Aizawla Assam Rifles chuan Zokhawsanga an hmun thara insawn hun turah Ministry of Home Affairs (MHA) aṭangin thu dawn an la nei lo. Hetih lai hian, Union Home minister Amit Shah chuan AR-te Zokhawsanga an insawnna hmun tur March 17, 2023-ah a hawng ang a, an insawn ṭan nghal dawn niin thuthang a awm thung.

Vanglaini thu dawn danin, Aizawl khawpui lailia awm Assam Rifles-te chu MHA hnuaia awm an nih angin MHA-in insawn tura an tih hma chuan Zokhawsangah an insawn dawn lo. Nimin thleng kha chuan MHA aṭangin an insawn leh insawn loh turah thu dawn an la nei lo. Chutih rualin, Zokhawsangah hian AR mi eng emaw zat chu an awm tawh sa a, training tihna atante an hmang mek a ni.

Mizoram sorkara thuneitu lamin Zokhawsanga Assam Rifles hmun turah an tih tur ang an ti zo tawh niin sawi mah se, Assam Rifles lam chuan an la ti zo loah an ngai thung. A panna kawngah siam ngai a la awm a, tui leh electric chungchangah pawh an insawn dawn a nih chuan an mamawh tur ang lak luh a la ni loah an ngai bawk.

Assam Rifles-te chu an la insawn lo a nih pawhin Lammual bula an hmunah Mizoram sorkara thuneitu lamin Laldenga Convention Centre sak an dil a, mahse, bahrik (barrack) eng emaw zat leh sikul a awm bakah, security thilah a him dawn loa an ngaih avangin Assam Rifles lam chuan an remti thei rih lo nia thu dawn a ni.

Thu dawnnain a sawi dan chuan, Zokhawsanga insawn tura harsatna la awm leh mamawhte chu Assam Rifles hotute'n MHA-ah an thlen ve reng ṭhin a ni.

March 17, 2023-ah Union Home minister Amit Shah chu Aizawlah a rawn kal dawn a, Zokhawsanga Assam Rifles hmun thar a hawng dawn nia sawi chungchangah Assam Rifles hotute chuan thu dawn an la nei lo. Chutih laiin, Chief Minister's Office lam chuan a chiangah an ngai thung.

Union Home Minister a rawn zin leh zin loh turah hian thu chiang tak a awm theih rih loh avangin a rawn zina venhimna kalpui dan tur chungchangah pawh Mizoram police lam chuan nimin thleng kha chuan inbuatsaih dan tur an hrethiam chiah lo nia thu dawn a ni bawk.