Ramria duty police pahnih kâp hlumtu Hav. BK Chakma a hna aṭangin bàn a ni

March 5, Pathianni zan dar 6 pelh hreta Kolasib district-a Saihapui-V bul, Buarchêpa ramri vénga duty police pahnih AK-47 rifle hmanga kâp hlumtu police Hav. Bimal Kanti Chakma (56) s/o Sigan Morot Chakma chu nimin khan a hna aṭangin bàn a ni a; a kah hlum tâk mi pahnih chhungte hna pek a ni dawn.

Inspector general of police (headquarters) John Neihlaia chuan nimin khan Police Headquarters-a DGP conference hall-ah thuthar thehdarhtute a kâwm a, Buarchepa thil thleng leh a kaihhhawih chung-changte a puang a ni.

John Neihlaia chuan, thil thleng chu communal thil a ni lo tih sawiin, "Chakma leh Mizo emaw, Chakma leh vai emaw thil a ni lo a, mi pakhat zu rui insúm thei lo thinrim thutin a kâp a ni. Hnam ang zâwng leh chi leh chi ang zâwnga kan lâk loh a ṭha a, inngeih lohna leh innghirnghona thlen lo se kan duh," a ti.

Thil thlen dan:
 John Neihlaia sawi danin, 2nd Bn. MAP mi pathum - Hav. Bimal Kanti Chakma, Tipperaghat, Lunglei district, Hav. J Lalrohlua, Lawngtlai Chanmari leh Hav. Indra Kumar Rai, Lunglei te chu Buarchepa Mizoram police main camp bulah an duty a, an duty post chu bahrik (barrack) a ni nghal. Zan dar 6:16-ah silai a puak a, silai puahna aṭanga metre 400 vela hlá main camp-a awmte'n an pan nghal a; an thlen chuan J Lalrohlua chu bahrik chokaah thia hmuh a ni a, bahrik aṭanga ft. 40 vela hláah IK Rai chu hliampui tuara hmuh a ni bawk.

Hav. IK Rai chu Vairengte damdawi-in panpui nghal a ni a, mahse, damdawi-in panpui a nih laiin zan dar 7:20-ah a hliam tuar loin a thi. J Lalrohlua chu a hnung lam aṭangin a lú-ah kah a ni a, IK Rai chu a áwm vei lamah kah niin, a malpuiah silai mu a tlang a ni. An ruang hi nimin khan Vairengte CHC-ah endik a ni a, chumi hnuah an in ve ve panpui a ni.

IK Rai hi a thih hmain thil thlen dan zawhfiah a ni a, a kâptu Hav. BK Chakma nen inhnial­na an neih loh thu a sawi. BK Chakma chuan, zu a ruih ṭhin thu an post commander hnena hrilh ṭhinah J Lalrohlua leh IK Rai-te a puh a, Pathianni tlai khan zu a ruih ṭhin thu an hotute an hrilh ṭhin tih an sawi avangin a thinrimin a kap ta niin a sawi tih John Neihlaia chuan a sawi.

Thil thlen dan:
IGP-in press meet a neih lai hian postmortem result hriat a la nih loh avangin police pahnihte taksaa silai mu lut zat hriat chian a la ni lo a; BK Chakma hman AK-47 rifle magazine-ah silai mu 13 a la awm a, an awmna velah silai mu kah ruahna cartridge 15 leh silai mu pakhat chhar a ni.

Hav. BK Chakma chu man nghal niin, Pathianni zan vêk khan Kolasib Chief Judicial Magistrate hnenah hruai a ni a, zanlai pelh hnu dar 1:30 AM-ah Kolasib District Jail-ah dah luh a ni. Thil thleng chungchangah hian Vairengte Police Station-ah IPC Section 302 tlawhchhanin tualthah thubuai ziah luh a ni.

Police hmalak zuina:
John Neihlaia chuan, Hav. BK Chakma chêt dan chu Mizoram Police chanchina la awm ngai lo a nih thu sawiin, "Ruiha insual te, eng emaw han intihpalhte chu a awm ve zauh zauh tawh ṭhin a, tun anga mahni silaia ṭhiante kah hlum ringawt mai hi kan la tawn ngai loh a ni," a ti.

BK Chakma chêt dan chu sawhkhâwk tam tak nei thei thil a nih thu sawiin IGP chuan, "Hetiang hi Mizoram Police-a awm reng tlakah kan ngai lo a, mi dang discipline-te pawh a tichhe thei ang a, a him lo. Chuvang chuan, dan pangngaia inquiry-te ti loin, danin thuneihna min pek tho hmangin Indian Constitution Article 311 hmangin dismiss nghal a ni," a ti. Bànna thupek (dismissal order) chu Pathianni zan khan peih vek tawh mah se, nimin khan 2nd MAP Commandant-in a chhuah tih a sawi.

John Neihlaia chuan, Police department-in an mi leh sa thite an ràl dan pangngai angin, J Lalrohlua leh IK Rai-a chhungte hnenah ràlna Rs 1,00,000 ve ve an pek dawn thu a sawi a, "Ramri buaia duty an ni a, rál kuta thi chu ni lo mahse thih dan pangngai lo an ni a, anmahnia innghat, an nupui leh fate, hna la thawk lo hnenah danin a phal angin compassionate appointment kan pe dawn a ni," a ti.

IGP sawi danin, Hav. J Lalrohlua fapa, kum tling tawh, police-a lut nghal mai thei a awm avangin appointment pek an tum a, dan angin tihfel ngai neuh neuh erawh a awm. Hav. IK Rai-a fapa erawh chu kum 17 mi a nih avangin kum 18 a tlin hunah appointment pek tum a ni thung.