Abu Majumder-a'n April 2020 aṭangin Mizoram tan buhfai a supply ṭan
Food, Civil Supplies & Consumer Affairs (FCSCA) minister K Lalrinliana chuan, Abu Ahmed Majumder-a'n April, 2020 aṭangin Mizoram tan buhfai a pek (supply) ṭan thu nimin khan Assembly session-ah House a hrilh.
ZPM member Lalduhoma zawhna chhangin FCSCA Minister chuan, "Commerce & Industries department aṭanga thu dawn danin, Abu Ahmed Majumder hian ZIDCO kaltlangin April 2020 aṭangin January 25, 2022 thlengin buhfai a supply," a ti.
ZIDCO kaltlanga buhfai supplier tur thlan a nih dan zawhna chu K Lalrinliana chuan, FCSCA department-in a hriatpui loh thuin a chháng.
Tarlan tawh angin Abu Majumder hi November 25, 2021-a Mizoram leh Assam Chief Minister-te ramri chungchanga an inbiaka zanriah an kilnaah New Delhi-ah a tel. Kum 2022 khan kuhva rah tawlh ruk chungchangah Assam police-ten an man a, bail-a chhuah a nih chhungin Kolasib-a Mizoram sorkar function pawimawhah hmuh a ni a, FCSCA minister inah chaw a eilai thlalak hmuh a ni bawk.