2023-24 Mizoram budget cheng vbc. 14,209.95; Revenue expenditure 78.10%, capital expenditure 21.90%

Finance changtu chief minister Zoramthanga chuan nimin khan Assembly budget session-ah kum 2023-24 Mizoram budget cheng vbc. 14,209.95 a pharh a; SEDP atan cheng vbc. 595 leh health care scheme atan cheng vbc. 60 dah a ni. Budget hi naktukah sawiho ṭan a ni ang.

Budget pumpui vbc. 14,209.95 zinga vbc. 11,068.76 (78.10%) chu sorkar hnathawk hlawh, sorkar inrêlbâwlna, pension hlawh (revenue expenditure) a ni a, kum hmasa aiin a pung. Cheng vbc. 3,141.19 (21.90%) chu hmasawnna hna thawhna tur (capital expenditure) a ni a, kum hmasa aiin a tlem zawk.

Chief Minister chuan, sum hmuh ngei an beisei, a zat tur hriat lohte tarlan tel a nih loh avangin capital expenditure chu budget-a lang aiin a la tam tur thu a sawi.

Sorkar kum kal mek 2022-23 atana Mizoram budget chu cheng vbc. 14,008.15 a ni a, kum thar 2023-24 budget tur vbc. 14,209.95 chu vbc. 201.8-in a tam zawk a, a punna chu 1.43% a ni. Hetih lai hian, kum 2021-22 budget (vbc. 11,148.89) aṭanga 2022-23 budget (14,008.15) punna chu 25.64% a tling thung.

State chhung aṭanga sum hmuh­na tura ruahmante chu - sorkar hna­thawk leh cooperative society-te'n loan an rulhna (Recovery of Loan & Advances) aṭangin cheng vbc. 33.60, state sorkara chhiah tling khawm State Own Tax Revenue (SOTR) aṭangin cheng vbc. 1,084.29 leh, chhiah ni lo aṭanga sorkarin sum a hmuh State Own Non Tax Revenue (SONTR) aṭangin vbc. 896.99 a ni.

Kum 2023-24 chhunga sorkar laipui aṭanga Mizoramin sum a hmuhna tura ruahmante chu - sorkar laipuia chhiah tling khawm state-a sem (Share of Central Taxes) aṭangin cheng vbc. 5,107.25, sum indaih lohna phuhrûkna Post Devolution Revenue Deficit Grant (PDRDG) cheng vbc. 1,474, urban local body (ULB) atan cheng vbc. 37, rural local body grant-ah vbc. 72 leh State Disaster Risk Management Fund (SDRMF) atan vbc. 52 a ni.

Mizoramin centrally sponsored scheme (CSS) hrang hrang a kalpuina turah sorkar laipui aṭangin cheng vbc. 2,412.40 hmuh beisei a ni a; páwn lam aṭanga puihna (external aided project) aṭangin vbc. 96.44 leh loan - Special Assistance to States for Capital Investment (SASCI) aṭangin cheng vbc. 385.77 leh, block loan cheng vbc. 10.71 hmuh beisei a ni bawk. State sorkar sum pûk tura ruahman chhin chu cheng vbc. 2,479 a tling.

Kum 2023-24 chhunga Mizoram sorkar leibat tur zat chu cheng vbc. 13,584.80 ni tura chhût a ni a, chu chu Gross State Domestic Product (GSDP) aṭangin 37.84% a ni.

Tun hnai kum nga chhunga debt-sustainability (sorkar leiba) chu kum 2018-19 ah 32.89% (actual), kum 2019-20 ah 32.72% (actual), kum 2022-21 ah 33.98% (actual), kum 2021-22 ah 40.98% (actual) leh kum 2022-23 ah 41.29% (revised estimate) a ni.

Mizoram GSDP ni tura chhût chu cheng vbc. 35,904.04 a ni a, kum kal mek revised figure cheng vbc. 30,223.60 aṭangin 18.79%-in a pung a ni.