MZU-in exam kaltlangpui an tum zel

Mizoram University-in a hnuaia zirna-in hrang hranga final year (even semester)-te tan August 10 aṭanga September 4, 2020 thlenga  exam buatsaih a tum chu ṭhulh a awm lo a; chutih rualin, Covid-19 chungchanga Mizoram dinhmun leh sorkar thu azirin a danglam thut thei.

Tarlan tawh angin, MZU-in exam a buatsaih tur hi course tina final year zirlaite tan a ni a, University Grants Commission (UGC)-in July 6, 2020-a Revised Guidelines in Examinations and Academic Calendar for Universities in view of Covid-19 Pandemic a tihchhuah anga ruahman a ni.

Vanglaini palai zawhna chhangin MZU Controller of Examination Prof. Lalnuntluanga chuan, final year zirlaite tana exam buatsaih tum chu tun dinhmunah chuan kaltlangpui tuma hmalak zel a nih thu a sawi a, "Chutih rualin, Covid-19 chungchanga kan ram dinhmun azirte pawh a ni tel a, veng ṭhenkhatah total lockdown an ti a, chung vengahte chuan college-te a awm. Lockdown kal zel dan azirin exam theih loh pawh thil awm thei a ni," a ti.

Prof. Lalnuntluanga chuan, exam buatsaih a nih pawhin, UGC kaihhruaina angin, hripui leng vanga zawm tur pawimawh (SOP) ṭha taka zawm chungin buatsaih tur a nih thu a sawi a; Unlock 2.0-ah August 31, 2020 thleng zirna-in zawng zawng khar tur tih ni mah se, final year exam bikah chuan Ministry of Home Affiars pawhin July 8 khan UGC hnenah phalna a pêk tawh thu a sawi bawk.

MZU-in exam buatsaih a tum dan chu - under graduate final year (6th semester) tan August 10-ah ṭan tum a ni a, post graduate 4th semester leh professional course final year-te tan August 17-ah ṭan tum a ni. Hetih lai hian, odd semester-te tana August 1, 2020-a class ṭan tum chu sorkar thuchhuak avangin tihpuitlin theih a ni lo.