Muallungthuah Aizawl city bus a tlân ṭan; Bus tlântir turin STA-in special permit a pe

Nimin zing aṭang khan Aizawl leh Muallungthu inkarah Aizawl city bus tlàntir ṭan a ni a, bus tlan hmasa ber chu Ngaizela Aizawl City Bus Owners’ Association (ACBOA) pisa kawt aṭangin minister Dr R Lalthangliana'n a vailiam. City bus tlântir tur hian State Transport Authority (STA) chuan a bik takin phalna a pe a ni.

Aizawl leh Muallungthu inkarah hian Aizawl city bus hi ni tin vawi riat a tlân tawn dawn a, bus hmasa ber chu zing dar 6:20-ah Ngaizel aṭangin a chhuak ang a, a dang zawng chu Bawngkawn aṭangin a chhuak dawn a ni.

Ngaizel leh Muallungthu inkara chuan man (fare) chu Rs 50 a ni a, Ngaizel leh Bawngkawn inkar bika chuan man chu city bus fare pangngai ang a ni ang.

City bus tlàntir thar chung-changah hian Vanglaini palai zawhna chhangin Transport director R Lalrammawia chuan, bus tlântirna tur chu city area páwn lam a nih avangin plying permit (tlân phalna) STA-in a pek a ngaih thu leh STA-in special permit a pek thu a sawi.

Transport Director chuan, ZMC chu mipuiin an pan tam theih nan veivahna a awlsam zawk nan lirthei, public transport tlàntir thuai a ngaih thu sawiin, "Central lam aṭangin ZMC endiktu tur rawn kal thut thei reng an ni a, ZMC hi mipuiin an pan tam a ngai a, pantu an tam loh chuan kan hloh palh thei a, public transport-in a zawm a ngai. A hmanhmawhthlak tawh si a, ACBOA lamin an duh vak lo chungin kan nawr lui a, anni tlawmngaiin an tlân dawn a ni," a ti.

Bus vailiamtu Dr R Lalthangliana chuan, Aizawl-Muallungthu inkara city bus tlân chuan Zoram Medical College a paltlang dawn avangin damlo te, damlo enkawltute leh damlo kantute tan ṭangkai tura beisei a nih thu a sawi a; hun eng emaw chen aṭanga an lo beisei tawh a nih thu sawiin, Transport minister TJ Lalnuntluanga’n a awlsam zawnga hma a lâk avang leh Transport department hotute leh ACBOA-in theihtawp an chhuah avangin lawmawm a tih thu a tarlang.

Dr R Lalthangliana chuan, Civil Hospital, Aizawlah khum dah belh a harsat tawh avangin ZMC-ah damlo dah luh a ngai ṭhin tih sawiin, "ZMC-ah hian khum 500 a awm bakah, cabin eng emaw zat siam mek a ni a, rei lo têah zawh kan inbeisei. City bus service hian heng chhawr ṭangkai kawngah hian kawngro a su ngei ang," a ti.

City bus tlân hmasa ber vailiamnaah hian Health & Family Welfare principal director Dr T Lalhmangaihi, ZMC director Dr John Zohmingthanga, Transport Director, ACBOA hruaitute leh Ngaizel-Muallungthu inkara khua/veng VC leh LC hotute an tel a ni.