UP-a loneitu nawrh huaihawtte chil hlumtua puh Union Minister fapa bail dilna SC-in a pawmsak

Supreme Court chuan kum 2021-a Lakhimpur Kheri, Uttar Pradesh-a loneitu nawrh huaihawtte motor-a pawng chil leh, loneitu pali leh journalist pakhat thihnaa mawhphurtua puh, union minister Ajay Mishra Teni-a fapa, Ashish Mishra-a'n kar riat chhung bail a dilna chu nimin khan a pawmsak.

Supreme Court chuan a bail dilna a phalsak rualin, Asish Mishra chu Uttar leh Delhi bakah a bul hnaiahte a awm thei lo ang tih sawiin, kar khat chhunga UP chhuahsan turin a ti. Bail-a chhuah a nih chhung hian Mishra leh a chhungten hian witness-te thlem leh hneh tuma hma an la a nih chuan bail hi cancel leh nghal a ni ang tih a sawi bawk.

Lakhimpur Kheri-a loneitute beih leh thihna thleng chungchangah hian Asish Mishra leh mi dang 12-te chu tualthah leh criminal conspiracy thubuai siamsak an ni.

Asish Mishra hi pawikhawihna a thlen hnuah kum khat chuang jail-a tantir a ni tawh. Court-a bail dilna an thehluhah, a ukil Mukul Rohatgi chuan an thubuaite court-in a kalpui dan ngaihtuahin, thubuai chinfel nan hian kum sarih/kum riat vel a duh thei dawn niin a sawi. Hetih lai hian senior advocate Dushyant Dave chuan bail phalsak hi duh loin, hei hian khawtlanga nghawng ṭha lo tak a thlen thei dawn a ni, a ti. Mahse Supreme Court chuan an dik lohna finfiah a nih phawt loh chuan, pawikhawihtua puh hi tiam chin awm loa hren reng theih a ni lo nia sawiin, bail dilna hi a pawmsak a ni.