Mizoram-Assam thuchhuah inṭawm zir chiangtu tur study group din a ni

Mizoram leh Assam ramri buai chinfel dan ngaihtuah tura din Boundary Committee chu nimin khan Forensic Science Laboratory conference hall-ah an ṭhukhawm a; Mizoram leh Assam sorkar inbiakna hnuhnung bera thuchhuah inṭâwm an siam zir chiang turin Mizoram University-a Political Science department-a Prof. J Doungel kaihhruai study group an din.

Ṭhutkhawm hi a vawi ngana a ni a, Committee chairman Lalchamliana, Home minister-in a kaihruai. Lalchamliana chuan, Mizoram leh Mizo mipuiin ramria an pawm tlàn chu Bengal Eastern Frontier Regulation (BEFR), 1875 a nih thu sawiin, "Hei hi November 17, 2022-a inbiaknaah pawh kan ṭan chhan a ni," a ti.

Home Minister chuan, ramri chungchangah leh hnam thilah Mizote ṭanrualna leh kan inlungrualna chu lawmawm a tih thu a sawi a; Mizoram leh Assam aiawhte inbiakna hnuhnung bera thuchhuah inṭâwm an siam bawhzui zelnaah ngaihtuahna zau tak pu turin Boundary Committee member-te a sáwm a ni.

IGP (Hqrs) John Neihlaia chuan, Mizoram leh Assam ramri depa dan leh thupek kenkawh dan leh tun hnaia Kolasib district depa thil thleng pali a sawifiah a; Home secretary H Lalengmawia'n November 16-17, 2022 chhunga Guwahati-a Mizoram leh Assam aiawhte inbiakna report a tarlang thung.

Ṭhutkhawmah hian, Mizoram leh Assam sorkarin thuchhuah inṭâwma a siama tarlan - Mizoram sorkarin ramri nia a pawm huam chhunga khaw awm te, an huam chin te, geo spatial extent te, mi chengte chanchin leh hnam (ethnicity) chanchinte leh ṭul dangte thla thum chhunga la khawm a, Assam sorkar hnena thehluh tur buaipui turin study group an din a ni.

Study group convenor atan Prof. J Doungel ruat a ni a, member secretary atan Lalthiamsanga Sailo ruat a ni. Member atan Land Revenue & Settlement department, Environment, Forest & Climate Change department leh MIRSAC hotute leh a ṭul angin mi pawimawh dangte ruat an rel.

Ṭhutkhawmah hian chief secretary Dr Renu Sharma, Home department hotu te, Boundary Committee member-te an tel a ni.

Ramri chungchangah hian high level delegation meeting vawi thum neih a ni tawh a; August 5, 2021 khan Aizawlah meeting hmasa ber neih a ni. Meeting vawi hnihna chu Aizawlah August 9, 2022 khan neih a ni a, November 17, 2022 khan Guwahati-ah neih leh a ni bawk. Ṭhutkhawm pathumah hian thuchhuah inṭâwm, joint statement siam zel a ni.