Tangkhang rawn hawte RAT-in endik vek dawn

Covid-19 Medical Operational Team chairman Dr ZR Thiam­sanga, MLA chuan, Covid-19 léng leh inkhàr­khip vanga state páwna Mizo tangkhang rawn hawte chu Rapid Antibody Test (RAT) hmanga endik vek an nih dawn thu a sawi.

Dr ZR Thiamsanga chuan, ruahmanna hma­saah chuan tangkhang rawn hawte chu rél thlen tàwpna Bairabi-ah RAT hmanga endik vek tur a nih thu thuthar thehdarhtute a hrilh a, "Mahse, thil buaithlak a tam avangin an qua­rantine-na hmunah ṭheuh RAT hmangin en a ni ang. Vawiina Chennai aṭanga lo haw ni lo, lo la haw leh turte pawh endik vek tur a ni," a ti.

Quarantine centre-a an luh tirh leh chhuah dawnah RAT hmanga endik leh theih ni se duhthusam a nih thu sawiin ZR Thiamsanga chuan, "RAT hmanga test hi a hautak a, vawi hnih test theih a ni dawn em tih ngaihtuah mek a ni," a ti a; RAT chu 10,000 chah thlen tawh a ni a, chah belh leh mek a nih thu a sawi.