Chhungkaw 97,079-ah tui connection pe tawh

Public Health Engineering (PHE) department chuan kumin July thla thlengin Mizorama chhungkua 1,34,028-ah tui connection pek an tum a, tun thlengin in 97,079 (72%)-ah tui connection an pe tawh.

Nimin khan Berawtlanga multipurpose hall-ah kum 2021 chhunga PHE department hnathawh thlir lêt a ni a, PHE enkawltu deputy chief minister Tawnluia'n a hmanpui.

Review meeting-a tarlan danin, Mizoramah chhungkua 1,34,028 a awm a, chu'ng zinga 97,079 (72%) hnenah tui connection pek a ni tawh. Pek hmabak chhungkaw 36,949 hnenah July 2023-ah chuan pek kim tum a ni.

Mizorama khua leh khaw per awm zawng zawng 742 zinga 333-ah hlawhtling takin Jal Jeevan Mission (JJM) hnuaiah hmalak a ni tawh a, 515-ah hmalak mek a ni. JJM hnuaiah hian scheme 848 kalpui a ni a, chumi hnuaia scheme 26 atan State Level Sanction Committee din a ni tawh a, sorkar laipui pawmpuina nghah mek a ni.

Minister Tawnluia chuan, PHE department mawhphurhna a sang tih sawiin, "Mipui pawhin beiseina sang tak an nei a ni," a ti a; thawktu indaih lohna karah an mawhphurhna ṭha taka an kengkawh thei chu lawmawm a tih thu leh hlawhtlinna pawimawh tak tak an neih thu a sawi.

Mizorama chhungkaw awm zat tarlan 1,34,028 hi PHE department review meeting chungchang sorkar thuchhuahin a tarlan a ni a; hetih lai hian, Mizorama chhungkaw awm zat chu nuai hnih a chuang tawh nia thu dawn a ni.