Home Minister thusawi a dik thei lo - PC President

Peoples Conference party president Vanlalruata chuan, Assam lamin Mizoram chin hectare 74,831 vela zau an luah mek laia Home minister Lalchamliana’n Assam-in Mizoram an la miah lo angin a sawi niin a sawi a, "Home Minister thusawi hi a dik thei lo," a ti.

PC party thuchhuah tarlan danin, Vanlalruata chuan, Innerline Reserved Forest hectare 1,31,831 (square mile 509)-a zau chu a pumin Mizoram ta a nih thu a sawi a, "Tunah hian Assam-in hectare 74,831 vela zau a luah mek... Kan ram hruaitute'n awmze neia hma an la lo hi an demawm tak zet a ni," a ti a; Assam Chief Minister-in Mizoram zau tak an chhuhsak anga a sawi chu ná a tih thu a sawi a ni.

Kumin tàwp lamah Mizoram inthlanpui a awm dawn tih sawiin PC President chuan, "Inthlanah hian kan ram humhalh ngam lo leh Assam-in kan ram a luah pawh lâk lêt tum ngam lo chu ram hruai tlak an ni lo tih mipuiin kan hriat ka duh. Kan ram leh hnam tana ngaihtuahna tak tak hman kumah kumin hi i hmang ang u," a ti.