New Market sa zo thuai turin sorkar phût

ZPM Ṭhalai hruaitute chuan nimin khan Aizawl New Market in pui ber sak mek an tlawh a; in sak mek chu muang an tih thu leh sorkarin a ngaihthah nia an hriat thu an tarlang a, sa zo thuai turin sorkar an phût.

New Market building sak mek an tlawhnaah hian ZPM Ṭhalai president Dr C Lalrammawia chuan, "MNF ministry hnuaiah hripui léng karah pawh an duhnaah chuan restricted tender hmangin hna tam zawk an thawk a, chutih laia Aizawl New Market sak hna hi sorkarin a ngaihthah a, hna kal muang lutuk hi mipui ngaihthahna a ni," a ti.

Dr C Lalrammawia chuan, New Market chu chhungkaw 2,000 chuang eizawnna hmun a nih thu sawiin, "Ṭhiah a nih aṭanga kum hnih hnuah contractor thlan a ni chauh a, hun rei tak hnua bazar building sak dan tur design intihsiakna siam a nite hi hun khawh ralna a ni," a ti a, New Market chu sa zo thuai turin MNF sorkar an phût tih a sawi.

ZPM Ṭhalai chuan, "Mipui tana ding thei lo, mipui hmangaihna tak tak nei lo sorkar kan nei hi a pawi kan ti hle a ni," an ti a; bazarpuia ni tina ei zawngte harsatna hriatpui a, an harsatna leh manganna chu infiamna atana hmang lo turin MNF hruai sorkar an ngen a ni.