KHAWTHLIR

Lungphùm phúm
Assembly speaker Lalrinliana Sailo chuan nimin khan a bial Chalfilh constituency-a Suangpuilawn Higher Secondary School kawtah Sinlung Hills Council hnuaia tribal hostel sak tur lungphùm a phúm. Hostel sakna atan sorkar laipuia Ministry of Tribal Affairs aṭangin cheng nuai 328 hmuh a ni a, first instalment-ah cheng nuai 70 pek a ni tawh.

NCM Secretary a rawn zin
Sorkar laipuia National Commission for Minorities secretary SK Dev Verman chuan nimin khan Secretariat conference hall-ah Mizoram sorkar officer-te a kâwm. Mizorama hnam hnufual leh sakhaw hran zuitu mi tlém zawkte hmasawnna tura sorkar hmalakna leh chhawmdawlna chungchang sawiho a ni a; Mizoram sorkar hmalakna hrang hrang tarlan a ni bawk.

Saihnuna Lungdawh
Art & Culture minister R Lalzirliana chuan nimin khan Serchhip district-a Léng khuaa Lallungkâwnah Saihnuna Memorial Society leh Art & Culture department ṭangkawp siam Saihnuna Lungdawh a hawng. Saihnuna hi Fanai hnam niin, kum 1927 khan Léng khaw lal a ni a; Pathian fak hla 28, khawhar hla 32 leh hla dang 24, a vaiin hla 84 a phuah a ni.

Helipad hawng
Minister C Lalrinsanga chuan nimin khan a bial chhunga Buarpui khuaah helicopter ṭumhmun (helipad) thar a hawng. Helipad hi MLA fund aṭanga siam a ni a, Mizorama thlawk mek Pawan Hans helicopter-in Lengpui Helipad aṭanga Buarpui Helipad thlen nan minute 18 vel hun a hmang a ni.

Republic Day sawiho a ni
Lunglei district bawrhsap Kulothungan A kaihhruaiin nimin khan DC conference hall-ah sorkar hotute'n January 26-a Republic Day 2023 hman dan tur an sawiho a; Ṭhuamluaia Mualah neih ni se, an ti a, khuallian atan Lunglei DC chu sorkarin a ruat a ni. Republic Day lawmnaah hian Ceremonial Parade neih tur niin armed, unarmed, school contingent leh band party-te an tel dawn a ni.