Bangladesh Zo hnahthlak ráltlân pakhat Bangladesh-Mizoram ramri bulah a thi

Bangladesh-a Zo hnahthlak, sahimna zawnga Mizorama rawn luh tum zinga mi pastor Sawmkhup (70 vel), Chheihkhiang khua chu January 4, Nilaini zan dar 8 vel khan India leh Bangladesh inrina bulah a thi a, a ruang hi Lunglei district-a Khawmawia a chhungte inah lâka vui tum ni mah se, nimin tlai thleng khan lak tuma kalte chu ramri-ah BSF-in an dang.

Thu dawn danin, Sawmkhup hi Evangelical Baptist Church pastor a ni a; mi dang eng emaw zat nen Mizoramah luh an tum a, mahse, Simnasora khaw bulah BSF sipaite'n an dan avangin Mizoramah lut thei loin hun eng emaw chen an táng a ni. Ramhnuaiah chaw ei mumal loin ni li vel an awm a, kawng laka nau hringte pawh an awm a ni.

Thu dawnna chuan, "Bangladesh ráltlânte nimin (January 3) tlai lamah BSF-te'n Simnasora bulah an man khawm a, chungte chu nizan khan Simnasora aṭangin ramri an panpui a, mi 164 an ni. An zinga mi pakhat, putar kum 70 vel mi chu a boral tih thu kan dawng. Ni li chhung ei tur an nei tawh lo a, an chau tawh hle a, tar chak lo lamte a nih avangin ei tur an hmu lo nen, min boralsan ta a ni," a ti.

Pastor Sawmkhup ruang la turin nimin chhun dar 11:30 vel khan Parva aṭangin mi eng emaw zat an kal a, an zingah police pawh an tel. Mahse, ramria duty BSF sipaite'n ruang la tura chhuah an phal loh avangin an lo dang a, nimin tlai dar 6 vel thleng khan an la indang a, a ruang awmna tak an hre thei rih lo bawk.

Thu dawn danin, Simnasora khuaah Bangladesh ráltlân mi 400 aia tam an lut tawh a, la lut lo mi 200 vel ramhnuaiah an awm bawk. Simnasora-a lut tawhte chu January 3 zan khan BSF sipaite'n an dah khawm a, mi 100 chuang chu ramhnuaiah tlânchhiain an bibo rih a ni.

Thu chiang tak hriat a har thu sawiin thu dawnna chuan, "Mizorama an luh hmain ramri-ah BSF-in an lo dang a nih chuan a hriatthiam theih deuh a, mahse, Mizoram khaw chhunga lut tawhte an hnawt kir leh chu hriatthiam har an tih thu sawiin, "An zingah naupang leh tar eng emaw zat an awm. Ramri aṭanga Bangladesh lama khaw hnai ber pawh ni 1/2 niléngte kal a ngai. Chuvang chuan, an tan ei tur a buaithlak hle. Push back-na aṭanga lak lêt theih dan awm hram se," a ti.

Parva-III khuaah pawh January 3 zan vêk khan mi 17 an rawn lut a, January 4 zingah BSF sipaite'n hnawh kìr an tum a, an vau bakah kut thlâk an tum tih sawiin, "Khaw chhunga rawn lut tawhte an tibuai nasa viau mai a. BSF laka an sahimna tur ngaihtuah a ngai khawp mai," a ti bawk.