Bangladesh ráltlân laka chêt danah CYMA-in lungawi lohna lantir dawn

Bangladesh aṭanga Zo hnahthlak ráltlân, Mizorama luh tumte BSF sipaite'n an lo dan ṭhin avang leh an vau ṭhin avangin Central YMA chuan lungawi lohna lantir nan January 9, Thawhṭanni khian Aizawlah sit-in demonstration an huai­hawt dawn.

Bangladesh ráltlânte chungchang hi nimin khan CYMA chuan an ngaihtuah a ni. CYMA president R Lalngheta chuan, Mizorama luh tum Zo hnahthlak ráltlânte BSF-in an lo dang ṭhin chu an duh loh thu sawiin, BSF leh sorkar laipui laka lungawi lohna lantir nan January 9-ah Raj Bhavan bulah punkhawm (sit-in demonstration) huaihawt an rél tih a sawi.

CYMA ṭhukhawm chuan, Bangladesh ráltlân Zo hnahthlakte Mizorama an luh theih nan hma la tura ngenna Ministry of Home Affairs-ah thlen an rél bawk.