March 2021 - September 2022 inkara ASF vanga sum hloh zat vbc. 534.52

Mizoramah vawk pûl hri, African Swine Fever (ASF) vanga sum hloh (economic loss) chu March 2021 aṭanga September 2022 thleng khan cheng vbc. 534.52 a tling.

Animal Husbandry & Veterinary additional director Dr Lalhmingthanga kaihhruaiin nimin khan Mizoram State Veterinary Council conference hall-ah ASF-in Mizoram a nghawng dan zirhona leh socio-economic a nghawng dan zirchianna report tlangzarhna, 'State Level Seminar cum Report Submission on Study of Socio-Economic Impact of ASF in Mizoram' buatsaih a ni. He hun hi AH&Vety secretary Lalzarmawii'n a hmanpui a, Pachhunga University College Economics department associate professor Dr Margaret Z Khiangte-in AH&Vety Secretary hnenah zirchianna report a hlân.

AH&Vety Director tarlan danin, kum 2021-22 chhung khan Mizoramah ASF vangin vawk 44,734 a thi a, vawk 23,474 suat a ni. Kum 2021 aṭanga September 2022 thlenga ASF vanga sum hloh (economic loss) chu cheng vbc 534.52 a tling a ni.

ASF-in Mizoram a nghawng dan zir chiangtu Dr Daniel Lalawmpuia, PUC Economics department assistant professor tarlan danin, Mizorama ASF lén thawh khatnaah district 11-a khua/veng 272-a vawk vulhtu chhungkaw 9,671-te vawk a khawih.

Zirchiannaa a lan danin, Mizorama vawk vulhtu 83.4% chu kum 50 hnuai lam an ni a, ziak leh chhiar thiam 98% an awm. Vawk vulhtu zinga 56.7%-te thla khat sum lak luh chawhrual chu Rs 10,000 - 25,000 a ni a, 45.9% chuan eizawnna pui ber atan an hmang.

Vawk vulhtu zinga 4.4% chuan 20 aia tam an vulh a, 31.6%-in vawk 6-20 inkar, 15.3%-in vawk panga, 10.4%-in vawk pali, 13.6%-in vawk pathum, 11.7%-in vawk pahnih leh 13%-in vawk pakhat an vulh a ni.

ASF lèn hnuah vawk vulh zinga 82.5%-in vawk damdawi pek (vaccination) an ti ṭhin a, 52.6%-in disinfectant an hmang ṭhin. ASF laka hmalak dan tur inkaihhruaina chu 91.1%-in an zàwm a, 9.9%-in an remhriat danin hma an la thung.

Zirchianna a lan danin, vawk vulhtu zingah ran doctor leh a kaihhnawih thuneitute phone hmanga ráwn ṭhin 66.4% an awm a, office-a kal chilh ṭhin 11.7% leh ráwn ngai lo 4.6% an awm a, antibiotics pe ṭhin 67.1% an awm bawk.

Vawk vulhtu 47.7% chuan sorkar scheme NLUP, SEDP, adt. hmang-in vawk vulh hmanga eizawnna bul an ṭan a; ASF-in a ngawng chhung-kaw hrang hrang zinga 16.1%-in sorkar aṭangin ṭanpuina sum an dawng a, 14.7%-in zangnadawmna dawngin, 8.9%-in hri danna an dawng a ni.

'Study of Socio-Eco-nomic Impact of ASF in Mizoram' hi ASF infected area 272 zinga 87 (30%) leh chhungkua a nghawng 9,671 zinga 968 (10%)-ah kalpui a ni a; nunphung leh sum leh pai a nghawng dan zir a ni.