AMC-in 2022-23 budget an ennawn Budget atan nuai 10,118.48 an pawm

Aizawl Municipal Corporation (AMC) Board of Councillor (BoC)-te December 29, 2022-a AMC Session Hall-a ṭhukhawm chuan kum 2022-23 budget ennawnin, revised estimate an siam a, kum 2022-23 budget atan an pawm.

Aizawl mayor Lalrinenga Sailo kaihhruai AMC BoC-ah hian executive councillor (Cash & Accounts) Lalringliana'n Mizoram Municipalities Act, 2007-in a phût angin 2022-23 AMC budget revised estimate a pharh a ni.

Kum 2022-23 atana AMC budget estimate (BE) cheng nuai 6,569.96 chu March 10, 2022 khan pharh niin, pawm a lo ni tawh a; December 29, 2022-a an ṭhutkhawmah hian revised estimate (RE) cheng nuai 10,118.48 pharh a ni a, pawm a ni. BE aṭanga RE punna chu cheng nuai 3,548.52 a tling. Budget hmanna tur ruahmanna an siam nghal.

2022-23 AMC budget RE-a a lan danin, AMC hian sum hmuhna - Own Source of Revenue-ah nasa takin hma a sâwn a; kum 2022-23 chhunga AMC-in sum a thawh chhuah tura beisei zat chu Rs 8,89,90,000 a ni a, state sorkar aṭangin Grants-in-Aid cheng nuai 2,301.39 leh Central 15th Finance Commission aṭangin cheng nuai 3,500 hmuh beisei a ni bawk.

AMC hian budget zinga 76.76% chu mipui kaihhnawih leh hmasawnna hna thawhna atan hman turin a ruahman a; inrêlbàwlna atan 23.24% dah a ni thung.

AMC sum hnár pui ber, Own Source of Revenue-ah 15th Finance Commission-in a beisei anga a pung zawnga an kal thei chu lawmawm an tih thu an tarlang a ni.