Zoram Mega Food Park-in Union Minister rilru a tiná

Sorkar laipuia Food Processing Industries leh Jal Shakti enkawltu minister of state Prahlad Singh Patel chuan, Kolasib district-a Zoram Mega Food Park-in a rilru a tihnat thu a sawi a; Mizoram sorkarin in tina tui herh haw a nih theihna tura hmalakna Jal Jeevan Mission (JJM) a kalpui dan ṭha a tih loh thu a sawi bawk.

Prahlad Singh Patel hian nimin tlai khan Mizoram BJP pisaah thuthar thehdarhtute a kâwm a; cheng vbc. 75 sênna tur Kolasib district-a Khamranga Zoram Mega Food Park a tlawh thu sawiin, "Inte chu awm ve mah se, engmah hnathawh hmuh tur a awm lo. Thil dik lo leh fel lo a awm tih ka hmu a, ka rilru a na hle a ni," a ti.

Mega Food Park-ah hian hawn a nih aṭanga thla ruk vel chhungin operational unit pakhatin hna a thawk ni àwma an hrilh thu sawiin Minister chuan, "Cold storage bakah, preservation unit-te hman ṭangkai a ni lo," a ti a; chhui chian a, action lak a la nih mai theih thu a sawi.

Food Processing Industries Minister sawi danin, Mega Food Park dinna tura ruahman cheng vbc. 75-ah hian sorkar laipuiin cheng vbc. 50 a tum (subsidise) a, tun dinhmunah cheng vbc. 45 a pe chhuak tawh a ni.

Jal Shakti minister Prahlad Singh Patel chuan, JJM kalpui danah tui lakna tur pawh enfiah mumal a ni lo tih sawiin, "JJM hian kalphung fel tak a nei. Review meeting ka neihpui hunah zawhna tur eng emaw zat ka nei a ni," a ti.

Prahlad Singh Patel chuan, JJM hnuaia tui dah khâwlna chu concrete-a siam tur a nih thu sawiin, "Plastic hmanga siamte a awm. Pipe pawh thîr hman tur a ni a, hmun ṭhenkhatah hman a nih laiin, hmun ṭhenkhatah chuan hman a ni lo. Hengte hi a chhiat hunah kan thlâk thei tawh dawn lo," a ti a; plastic hman a ni chu pawi a tih thu a sawi.

Zawhna chhangin Union Minister chuan, ministry a enkawl kaihhnawiha Mizoram sorkara hotute a ṭhutkhawmpui hunah hmalak zel dan turah thutlukna a siam tur thu a sawi a ni.

Prahlad Singh Patel hian nimin khan Mizoram a rawn thleng a, Lengpui Airport-ah Commerce & Industrial Board vice chairman K Laldawngliana, MLA leh sorkar hotute'n Lengpui Airport-ah an lo hmuak. Nimin khan Ministry of Food Processing Industries hnuaia Mega Food Park Scheme hmanga din, Zoram Mega Food Park, Khamráng a tlawh a, a dinhmun a enfiah a ni.

Union Minister hian vawiinah Lawngtlai a tlawh dawn a ni.