MZU UG result-a college-te dinhmun HATIM pass percentage a sang ber

Mizoram University-in tun hnaia under graduate result a tihchhuahah, sixth semester (final year) bikah Arts (B.A)-ah chuan Mizorama college 22 zingah HATIM-in 100% result neiin an ti ṭha ber a; Science (B.Sc.)-ah Pachhunga University College (PUC) leh Commerce (B.Com)-ah Higher and Technical Institute, Mizoram (HATIM)-te pass percentage a sang ber.

B.A final-ah hian 100% result nei HATIM hi candidate nei tlem ber dawttu niin, candidate 21 chiah an nei a, candidate nei tlem ber dawttu Zawlnuam College-in zirlai exam 18 an nei. PUC chu candidate ngah ber niin, pass percentage-ah a ṭha ber dawttu (84.96%) an ni. PUC hian B.A-ah gold medalist an neih bakah, Arts-a subject topper 13 zinga pariat an kawl bawk.

Mizoramah B.Sc. zir theihna college paruk a awm a, chu'ng zingah chuan candidate ngah ber PUC-ah candidate 236 neiin, 163 an pass a, an pass percentage chu 69.07% niin, pass percentage sanna ber an ni. B.Sc.-ah hian subject pakua a awm a, chung zinga subject pasariha topper-te chu PUC-a zir an ni a; Zirtirti Residential Science College leh Lunglei College-in topper pakhat ve ve an nei thung.

Mizoram pumah B.Com. zir theihna college panga a awm a; chu'ng zingah chuan Hrangbana College-in sixt semester-ah zirlai exam 106 neiin, candidate ngah ber an ni a, pass percentage chu 77.36% a ni. B.Com. topper pawh Hrangbana College-a mi a ni. B.Com-a pass percentage sanna ber chu HATIM niin, 91.43% an pass a; PUC-in an dawt (80%) a ni.

Home Science (B.Sc.) zirna Mizoramah pakhat chauh a awm a, chu chu Zirtiri Residential Science College a ni. MZU-in under graduate result a tihchhuah takah khan B.Sc. (Home Science)-ah hian zirlai 19 an exam a, chu'ng zingah chuan pasarih chiah an pass a, pass percentage chu 36.84% a ni.



Share this Post

Login to comment
No Comments