Special Task Force din ni mah se, Chakma foreigner lut report a awm lo

Ministry of Home Affairs (MHA) Foreigners Division-in November 23, 2009-a state leh union territory tinte hnenah Bangladesh aṭanga foreigner lo lutte man chhuah kawnga thawktu tur Special Task Force din tura a tih angin, Mizorama district pathumah din a ni. District pathumah hian Chakma foreigner, Bangladesh aṭanga Mizorama lut an neih thu report a awm lo.

Vanglaini-in RTI Act hmanga a zawhna Home department-in a chhan danin, kum 2009 khan MHA Foreigners Division chuan state leh UT tinte chu lehkha letter no. F.14011/55/09-F.VI 23.11.2009 thawnin, district tinah Special Task Force din turin a ti a; state leh UT-te bakah, Border Security Force (BSF)-te chu Bangladesh mi, dan loa an state/UT-a lut turte man tur leh zawng chhuak turin a ti a ni.

MHA lehkha bawhzui hian Mizoram sorkar chuan August 13, 2015-ah district pathum - Lunglei, Lawngtlai leh Mamit district-ahte Special Task Force a din a; Home department-in record a neih dan chuan, district pathuma Deputy Commissioner-te

ṭheuh kaihhruaina hnuaiah quarterly meeting nei tura tih a ni. Mahse, hmalakna duh anga a chak tâwk loh avangin tunah hian civil sub-division level-ah committee hran din turin hma a la leh bawk.

MHA Foreigners Division-in tih tur a tih anga Mizoram sorkarin Special task Force dina hma a laknaah hian, kum 2015 aṭanga tun thlengin Lunglei, Lawngtlai leh Mamit district-a DC-te chuan Bangladesh aṭanga dân kalha lutte man chhuah an neih thu an la report lo a; foreigner man chhuah an la awm loa ngaih a ni.

DC-te'n thla tina report an pek, Home depart­ment-in a neih chinah hian Lunglei leh Mamit district-te'n Home department-ah report pe mah se, Lawngtlai district report erawh chu Home department-in an nei lo a; Lung­lei leh Mamit district report-ah pawh, Bang­ladesh aṭanga dan loa Mizoram lut man chhuah leh bawhzuina chi reng reng an neih loh thu ziakin Home department-ah an thlen ṭhin.

Mamit district-a Special Task Force report, Mamit DC, Addl. DC leh SDO (Sadar)-te'n Home department-a an thawn hmasak ber chu March 6, 2017-ah a ni a, March thla aṭanga October 2017 thleng thla tin report an thawn ṭhin.

Mamit district report-ah chuan, MHA (Foreigners Division)-in ruahmanna a siam angin, tih dan chi ruk hmangin Bangladesh aṭanga dân loa foreigner lutte an thliar a; dân loa Mizorama lo lute Foreigner Act hmanga man te, BSF hnena hlan te, dân kalha lut man hrim hrimte leh thubuai nei buaipui zui ngai leh a dangte a ni.

Mamit district aṭanga report zawng zawng chu DC, Addl. DC leh SDO (Sadar)-te chuan kum 2017 chhung zawng thla tin 'nil' tiin an ziak vek a; hetiang tho hian Lunglei district pawhin Home department-ah report an thawn ṭhin a, SDO (Sadar)-te'n report hi an ziak ṭhin.

Hetih lai hian, Census office chuan, kum 2001 chhiarpui leh 2011 chhiarpui inkarah Mizoramah Chakma 25,689 an pung niin a chhinchhiah.

Census office-in a chhin­chhiah dan chuan, kum 1951 aṭangin kum 10 dan zelah Mizorama Chakma pun dan an chhinchhiah a; kum 1951-ah Chakma 15,297 an awm laiin, kum 2011-ah chuan 96,972 an awm tawh.

Kum 10 dana an pun nasat ber hun chu kum 2001-2011 chhiarpui inkarah a ni a, mi 25,689-in an pung. Kum 1971-1981 inkarah mi 17,245-in an pung a, kum 1991-2001 inkarah mi 17,066-in an pung. Kum 1981-1991 inkarah mi 14,579-in an pung a, kum 1951-1961 inkarah mi 4,040-in an pung a ni.