RRF ṭhiahna thupek HC-a khin lêtna aṭangin Mizoram sorkar a inhnûkdâwk

Gauhati High Court-in Riverine Reserved Forest (RRF) notification a ṭhiahna Mizoram sorkarin a khinnaah Mizoram sorkar a inhnûkdâwk a, hei vang hian High Court chuan thubuai a titawp.

Justice S Serto leh Justice PJ Saikia te ṭhutna Gauhati HC Division Benchin November 9, 2022 (Nilaini)-a order a tihchhuaha a lan danin, HC thutlukna khin lêtnaah hian Mizoram sorkar ukil H Lalmalsawmi chuan khing lêttu Mizoram sorkarin a khin lêtna aṭangin inhnuhdawh a duh thu Court a hrilh a, phalsak turin Court a ngen a ni.

Mizoram sorkar ukilin a dil ang leh a lehlama ukil Lalfakawma pawhin hnialna a neih loh avangin, Gauhati HC chuan order a lo chhuah tawh khin lêtna thubuai chu November 9, 2022 khan a titàwp ta a ni.

January 27, 2021 khan Gauhati High Court chuan Mizoram sorkarin RRF-a a lo puan tawh chu danin a phût ang tifamkim loa puan a ni tiin thu tlingah a pawm lo. Hei hi Mizoram sorkar chuan khingletin, hun eng emaw chen hnuah a khinletna aṭang hian a inhnukdawk a ni.

Thu dawn danin, Tuirial Hydro Electric Power Project siamna atana Tuirial lui khuahna turah tuiin a chîm tur ram neitute hnenah zangnadawmna pek a ni a, a hnuah zangnadawmna pek phûttu, ram nei (pass nei) mi eng emaw zat an awm leh a; Tuirial HEP siamtu NEEPCO pawh an inhnuhdawh phah a ni.

Tuirial HEP-in a chîm tur china ram pass eng emaw zat awm thar leh zangnadawmna phût chungchangah thil dik lo a awm nia ngaiin Society for Social Action (SOSA) chuan Gauhati HC-ah public interest litigation (PIL) an thehlut a, High Court chuan CBI a chhuitir a ni.

Chumi hnuah ram (pass) neia insawite chuan hlâwm hrang hrangin Gauhati HC-ah writ petition an thehlut a; Gauhati HC Single Bench chuan RRF notifi cation chu a paih ta a ni. Tuikhuahin a chîm china ram neitute hnena zangnadawmna pek ngai tur pawh Mizoram sorkar pek turin a dah bawk.

Gauhati HC Single Bench thutlukna chu Mizoram sorkarin Gauhati HC vêk Division Bench-ah a khing lêt a; High Court chuan ram neitu hlawm hrang hrangin writ petition an thehluhte nen thu inang tlang a nih avangin hlawm khatah a dah a, High Court chuan thutlukna a siam ta a ni.

Hetih lai hian, Centre for Environment Protection (CEP) chuan Gauhati HC Single Bench-in RRF notifi cation ṭhiahna order chu khin lêt phalna Supreme Court-ah an dil a, Supreme Court-in phalna a pek angin High Court-ah an khing lêt ve a ni.

CEP khin lêtna hi chu Gauhati HC Chief Justice telna Division Bench (Principal Bench) ngaihtuah tura dah a ni a, hei vang hian RRF notifi cation ṭhiahna thupek khin lêtna chu a la tàwp vek lo a, la ngaihtuah zui zel tur a nih thu CEP hotute chuan Vanglaini an hrilh.