Airport thawm ṭhat hna la zo lo Kar khatah thlawhna ni 6 a thlâwk

GAD hnuaia Civil Aviation principal consultant Wg.Cdr. J Lalhmingliana chuan Vanglaini palai zawhna chhángin, Lengpui Airport thawm ṭhat hna thawh zawh a la ni loh thu a sawi. Lengpui Airport-ah hian chawlhkar khatah ni ruk thlawhtheihna a thlawk mek.

Wg.Cdr. J Lalhmingliana chuan, Lengpui Aiport thawm ṭhatnaah thawh tur a tam thu sawiin, "Covid-19 vanga thlawhtheihna service theih loh lai kha kan chuh a, runway bik siamṭhat hna chu kan zo tawh. Runway bakah hian thil dang hrang hrang thawm ṭhat hna thawh mek a ni a, thlawhtheihna service tibuai lo záwnga thawh a ngaih avangin thawh chak theih a ni lo," a ti.

Lengpui Airport-ah hian chawlhkar khatah ni ruk chhung thlawhtheihna a thlawh ṭhin thu sawiin J Lalhmingliana chuan, "Thawhṭanni, Zirtawp leh Inrinniahte Indigo Airlines thlawhna a thlawk ṭhin a; Thawhlehni, Nilaini leh Ninganiahte Air India thlawhna a thlawk ṭhin thung," a ti a, Pathianniah chuan thlawhtheihna thlawk a awm rih loh thu a sawi.

Civil Aviation Principal Consultant chuan, thlawhtheihnaa chuang tur an awm ve reng thu sawiin, "Indigo leh Air India hotute ka biak pawhin seat a chanve aia tam daih luahkhah reng a nih thu an sawi. An thlawhtheihna dintir mai mai ai chuan hetia a service reng hian an tan chuan a ṭha zawk hrim hrim a ni," a ti.