Mizoram sorkar karna atan Hachhekah pisa kai tur dang zel
Hachhek Bial Kuhva Chingtu Pawl (HBKCP), Hachhek bial chhunga village council-te leh páwl hrang hrangte'n an bial chhunga sorkar hnathawk pisa kái turte an dan chu an la chhunzawm zel. He hmalakna hi Hachhek biala kuhva tharte hralh a nih theih nana hma la tura sorkar kârna a ni.
HBKCP hruaitute hnen aṭanga Vanglaini thu dawn danin, sorkar hnathawkte pisa kai tur dan hi November 1 khan kalpui ṭan a ni a; an thil phût chungchangah Mizoram sorkar aṭanga thu dawn an la neih loh avangin ruahmanna an siam sa anga kal zel an tum.
Vanglaini thu dawn danin, Thawhlehni ang thoin Hachhek biala khaw hrang hranga sorkar pisa bulah duty an indah a; sorkar hnathawk zingah duty-te'n an dan luih ngai an awm lo a, boruak rálmuang tak hnuaiah hun hman a ni.
HBKCP, VC leh pawl dangte'n ruahmanna an siam dan chuan, November 1-4 chhung sorkar hnathawk pisa kai tur an dang dawn a, awmzia a neih loh chuan November 5-8 chhung Hachhek biala kawngpui zawng zawng an dang dawn. Kawngpui danin awmzia a la neih loh zel chuan November 9, 2022 aṭangin total bandh kalpui an tum a ni.
Hetih lai hian, vawiin hian Hachhek Bial Kuhva Chingtu Pawl hruaitu ṭhenkhatte chu Aizawlah an rawn kal dawn a, Mizoram tlawha rawn zin tur President Droupadi Murmu hnenah memorandum thehluh an tum a ni.