MNF-te hi kan hmanrua mai an ni - Mizoram BJP President

BJP, Mizoram Pradesh president Vanlalhmuaka chuan, MNF party chu Cong­ress party vuak thlûkna atana BJP hmanrua mai an nih thu leh kum 2023-a Mizoram inthlanpuiah BJP-in sorkarna an chelh tawh dawn thu a sawi.

Vanlalhmuaka hian Octo­ber 22, Inrinnia BJP, Mamit District Executive Meeting a hmanpuinaah thu sawiin, "MNF party hi Congress party vuak thlûkna atan kan hmanrua mai mai an ni a, kan thawhpui loh chuan an dingchhuak tawh dawn lo," a ti.

Mizoram chu state hnufual ber pawl a nih avangin, state dangte ruala kal turin an tlai tawh mah mah nia sawiin Vanlalhmuaka chuan, "Mizote hi hnam taima kan nih avang erawh chuan state dangte kan la ûm phâk theih ka ring," a ti a; state dangte ûm pha turin BJP an sorkar a ngai a, kum 2023 inthlanpuiah BJP sorkartir a ngai niin a sawi.

Mizoram BJP President chuan, central-ah BJP hneh takin a sorkar mek a, hmarchhak state tam zawkah pawh sorkarna an siam tawh tih sawiin, "Mizoramah pawh nakkum 2023 MLA General Election kan neih hnuah chuan sorkarna kan chelh ve tawh dawn a ni," a ti.

Vanlalhmuaka chuan, BJP chu hnam hnuaihnung zawkte kawng tinrénga duhsaktu a nia sawiin, "Mizoram pawh hian chu malsawmna chu tun aia nasaa kan dawn theihna turin a dawhthlêng kan lo siam rem fuh a ngai dawn a ni," a ti a; BJP chu eirûkna nasa taka dotu a nih thu leh Mizoramah BJP a sorkar chuan mipui chan ai eirute hnungkhirh an nih dawn thu a sawi bawk.