Mahni insawhnghehna atan martarte Hmang tawh lo turin CM Zorama chah

Mizoram Pradesh Congress Committee (MPCC) chuan, MNF president leh chief minister Zoramthanga chu politics-a a insawhnghehna tur leh a hausak zelna atan ram leh hnam tana martarte hmang tawh lo turin an chah.

MPCC chuan thuchhuah siamin, October 19, 2022-a Aizawl North-II MNF Block Conference-ah Zoramthanga'n 'Pathian leh kan ram tan tia mi sang tam tak thisena baptist tawh MNF party hi kan kalsan thiang lo,' tia a sawi chu politics-a ama insawh nghehna tur leh hausak belhchhah zel a tumnaa an ngaih thu an tarlang.

MNF movement-ah mi tam tak an thi a, thi zinga Mizo tam tak chu MNF kut tuara thi an nih thu sawiin MPCC chuan, "Chhungkaw tam tak baihvai takin an awm phah. Pu Zoramthanga kaihhruai MNF sorkarah hian ram leh hnam tana nunna hlantute leh an chhungte'n ngaihsak an hlawh lo hle a, hetiang a nih laia politics-a a insawh nghehna tur leh a hausak zelna tura ram leh hnam tana martarte hmang fo tawh lo turin MNF President hi kan chah a ni," an ti.

Congress party chuan, Mizo hnam leh ram tana nunna hlàntute an ngaihluin a zah a, Congress sorkar laiin nasa takin tuamhlawm nia sawiin, "Pu Zoramthanga hian Pathian leh kan ram tan tih ṭawngkam hi la sawi ve ṭhin mah se, he thuthlung hi Pu Zoramthanga leh MNF party hian an kalsan tawh," an ti a; MNF sorkar thil tih dan enin, 'Pathian leh kan ram tan' tih thu sawi tur chia an ngaih loh thu an tarlang.

MPCC chuan, MNF sorkarah chuan ram tana tuartu te, martarte leh an chhungte aiin Kamrula leh MNF tana ṭangkaina nei miah lote'n ngaih pawimawh an hlawh zawk niin an sawi bawk a; Mizoram zalenna atana thâ thawhtu, lungawi lo chunga MNF-a la awm hrâm hrâmte chu Congress party-a lut turin an sáwm a ni.