Mamitah Faina Hapta khâr a ni

Mamit district-a Faina Hapta hman chu nimin khan Mamit Chhimveng YMA Hall-ah khar a ni a, district bawrhsap Lalnunhlua'n a hmanpuiin, hapta puala inelna hrang hrang lawmman a sem.

Fai bera thlante chu - sorkar pisaah District Child Protection Unit office, veng fai berah Mamit Venghlun, primary school & middle school fai berah St. Francis of Assisi School, high school - college fai berah Mamit College, restaurant fai berah Samuel Restaurant, bazar fai berah Bazar Veng Bazar leh health care facility fai berah Bazar Veng Sub-Centre te a ni.

DC Lalnunhlua chuan, Faina Hapta khar ni mah se, fai tura hmalakna erawh khâr tel a nih loh thu a sawi a, "Fainain a ken tel chu changkanna a nih angin, hmasawnna tur tam tak kan la neihah theihtawpin hma la zel ila, Aspirational District aṭanga district dangte ûm phâk a, faina lamah hmasawn a ṭul," a ti.