Zosap Missionary Pu Nela a thi

Mizorama Welsh missionary zinga mi Rev. Bruce Tennyson Nelmes, Mizote'n Pu Nela tia an koh ṭhin chu May 3, 2020 khan a thi a, vui hun tur erawh hriat a la ni lo.

Thu dawn danin, Rev. BT Nelmes hi August 26, 1931-ah Llantrisant, Wales-ah a piang a, scientist ni mah se, Pathian rawngbawl a duh avangin BD a zir leh a, a zir zawhah pastor atan nemngheh a ni. Kum 1959-ah missionary hna thawk turin Mizoram a thleng a, kum 1961-ah Cachar Hill Tribe-ah sawn niin, Mizoramah kum hnih vel chhung a awm.

Mizorama a awm chhungin Aijal Theological School (tuna ATC)-ah zirtirtu a ni a, Synod Press lam hna a puih bakah, Kulikawn Kohhran a enkawl tel bawk a; amah hi KṬP dintu Pu Awna (Rev. OW Owen) thlak tura rawn chhuak a ni. Kum 1962-a Wales-a a let leh hnuah Glamorgan College-ah zirtirtu hna a thawk chhunzawm.

Pu Nela hi an inah tlu palhin a lû a sawh a, hun eng emaw chen Royal Glamorgan Hospital-a enkawl a nih hnuah May 3 zan dar 9 khan a thi ta a ni.

Welsh missionary Mizorama rawn chhuak zingah tunah hian mi pahnih chiah an la dama hriat a ni a; chu'ngte chu PC Girls School headmistress ṭhin Angharad Roberts (Pi Zopari) leh Margareth Jones (Pi Zawni), Basyl Jones (Pu Zawna) nupui te an ni.