Lunglei district-a hnathawh thlirlet

Lunglei District Development Coordination and Monitoring Committee chu nimin khan DC conference hall-ah chairman CL Ruala, Lok Sabha MP leh co-chairman Ronald Sapa Tlau, Rajya Sabha MP hoin an ṭhukhawm a, Lunglei district-a hmasawnna hna thawh hrang hrangte an thlir lêt.

CL Ruala chuan, district tina department hrang hrangte'n ram hmasawnna an chelh thu sawiin, "Ṭhahnemngai taka mahni hna ṭheuh kan thawh hian kan ramin hmasawnna a pan dawn. Faina leh thianghlimna hian hriselna lamah nghawng thui tak a nei a, tlang hri lêng leh nau piang thi a tihtlem phah avangin ram thianghlim leh hriselna kawngah chak taka hmalak a ṭul," a ti.

Ronald Sapa pawhin thu sawiin, sorkar official-te chu mahni hna thawhnaah sûlhnu ṭha tak an hnutchhiah theih nan theihtawp chhuah turin a chah a; tlawmngai pawlte chu ram siam kawngah mawhphurhna pawimawh tak an neih avangin, sorkar hmalakna thlawp zel turin ngen bawk.

Meeting-a tarlan danin, kum kal mek 2017–18 chhung hian MGNREGS hnuaiah job card nei mi 35,517 tan ni 39 inhlawhna siam a ni tawh a; MGNREGS hnuaia hna thawhte chu geo tagging-a kalpui a ni.

Individual House Hold Latrine (IHHL) hnuaia ek-in sak tur 950-ah 690 sak zawh a ni tawh a; kawngpui dungah km 82.23 thing phun a ni tawh.

PMGSY hnuaiah kawng siam lai panga neiin, pakhat siam zawh a ni tawh a; DDUGJY hnuai­ah khaw paliah êng pek tur kalpui mek a ni. Mid Day Meal hnuaiah primary school leh middle school 552-ah naupang 28,739 tan chawchhun pek a ni a; ICDS hnuai­ah tar pension mi 5,268 hnenah pek a ni bawk.