MSHCS-in MR bill a enfiah zel dawn ; Sum sen 20% vela a tlem phah beisei

Sub-Committee on Medical Reimbursement rawtna angin, Mizoram State Health Care Society (MSHCS) chuan sorkar hnathawkte medical re-imbursement (MR) bill reng reng an endik hmasa zel tawh dawn. MR bill a tlem zawk theihna tura hmalakna thar avang hian MR bill chu 20% vela a tlakhniam theih beisei a ni.

RTI Act hmanga zawhna Finance department-in an chhan danin, Sub-Committee on MR chuan sorkar hnathawkte MR bill dan leh a kaihhnawih thil tam tak an siam dang­lam a, Mizoram sorkar pawhin a pawmpui tawh. Sorkar hnathawk damlo, phai lama inenkawlte senso tur pawh bithliah thar a ni a, an hman theih zat bithliah aia tam an hmang a nih chuan anmahni pawisa an chawi ang a, sorkarah an dil thei tawh lo ang.

Damlo na zual, intensive care unit (ICU)-a dah ngaite chu eng natna pawh ni se, sorkar­ah bill leh theih ni se, tiin Sub-Committee chuan an ti a; sorkar hna an thawhnaa an dinhmun azir zela bill theih turin an dah.

Ni khata ei leh in man pawh bithliah vek a ni a, damlote chuan anmahni puitu tur mi pakhat an hruai thei ang a; nawrlirha nawr ngaite leh naupang kum nga hnuai lamte chu mi pahnihin an hruai thei thung.

Sub-Committee chuan sorkar hnathawk damlote zin veivahna atan pawh a tláwm thei ang ber ni se, an ti a, Medical Board-in rawtna a pek ang zela kalpui tura tih a ni. Zin veivahna rate re-imburse tur chu zin vawi khatnaa airlines-in an charge anga kalpui tur a ni a, a hnu leh zela zinna erawh bituk chin neiin kalpui a ni ang.

Thlawhnaa zinna man an bithliah dan chu - Aizawl - Imphal/Guwahati/Kolkata kal lam leh haw lam atan Rs. 10,000, Aizawl - New Delhi/Mumbai/Chennai/Hyderabad/Thiruvananthapuram/Bengaluru atan Rs. 20,000 a ni. Entitlement bituk thar a ni a; chu chuan sorkar hnathawkin a awm phâkna aia sanga damdawi-in room-a awm an tum ṭhin a tihbo beisei a ni.

Mimal damdawi-in ṭhenkhatin damlo

ṭhenkhat chu damdawi an mamawh aia tam chawh (over treatment) ṭhin nia hriat a nih avangin, MR bill reng reng MSHCS-in an enfiah hmasa zel tawh dawn a, chu chuan sorkar sum senso a tihniam tura ngaih a ni. Sorkar hnathawkte chu an hlawh azira room awmna chin nei tur an nih laiin, an awm phak lohnaah awmtir an nih fo thu avangin sorkar sum sen a tam phah niin an sawi.

March 2017-a Assembly session-ah khan, Mizoram sorkarin khatih laia sorkar kum kal mek kum 2016-17 chhungin sorkar hnathawkte leh an chhungte damlo inenkawlna senso, MR atan cheng vbc. 78.09 a sêng tawh niin Finance minister Lalsawta chuan Lalrinawm­a, MNF MLA zawhna chhangin a sawi a ni.

Entitlement bithliah thar

Pay Grade Pay Entitlement

Band (Rupees) (Zan khatah)

4 8,700 leh a chung lam Rs. 2,000 aia sang lo

3 5,400 leh a chung lam Rs. 1,000 aia sang lo

2 4,400 leh a chung lam Rs. 700 aia sang lo

2 4,200 leh a chung lam Rs. 500 aia sang lo

1 1,800 leh a chung lam Rs. 300 aia sang lo

1/-1S 1,800 hnuai lam Rs. 200 aia sang lo