Ṭangrual Pawl office hawn a ni ; Mipuiin ZPM an ngaihven - Lalfakzuala

Pawl panga ṭangrual Zoram Peoples' Movement (ZPM) pisa thar, MPC pisa hnuaia mi chu nimin khan ZPM Val Upa Council (VUP) chairman Lalfakzuala'n a hawng. Lalfakzuala chuan mipuiin ZPM an ngaihven thu a sawi.

ZPM office hawnna inkhawm hi Steering Committee chairman Lalliansawta'n a kaihruai a; Lalfakzuala chuan, ZPM chu thla khat âwrha upa chauh a ni chungin, a thâwm a nat thu sawiin, "ZPM hi mipuiin an ngaihven a, a chhan chu sorkar thar an duh vang a ni. Sorkar tura rintlak an ni ang em tiin an thlir ṭhup a ni," a ti a, ṭangrual pawlte chu mipui rintlaka an awm a pawimawh thu a sawi.

VUP Chairman chuan, ZPM chu mipuite'n rinna an nghah theihna tur leh mipuite'n an thil tum an hriat theihna atana hman ṭangkai a pawimawh thu sawiin, "Mipui sorkar, Zo fate damna, himna, kalphung thar nei sorkar siamna atana hmanraw pawimawh tak a nih theihna atan office hi lawm takin ka hawng e," a ti.

Inkhawmah hian pawl panga - Zoram Nationalist Party (ZNP), Mizoram People Conference (MPC), Zoram Exodus Movement (ZEM), Zoram Democratic Front (ZDF) leh Zoram Reformation Front (ZRF) President ṭheuhte pawhin thu an sawi.

ZDF president Rev. Darchungnunga chuan, Mizoramah party politiocs leh sorkarna kalsualpui nasat a nih avangin, sakhuana lama rawngbawltute an intelkhawm thu a sawi a, "A kalphung a dik loh vanga politics luh chilh loh ngawt chuan a chhe zel dawn a, chuvangin, siamṭhat hna ngaihtuah chunga luh chilh ve a ngai," a ti.

ZEM president K Sapdanga chuan, MLA inthlanah mi tam takin phûr lo takin vote an thlak ṭhin tih sawiin, "Pawl pahnih kan bûk a, thlan châk zawk kan neih loh vanga phur lo mai kan ni. Kum 2018 MLA inthlan aṭang chuan, mipuiin phûr takin vote an thlak tawh ang," a ti a; mipuiin vote an thlak chhan tur chu sorkar ṭha, hnam himna thlen tur, mipui sorkar din theihna kawng a inhawn tak vang a nih thu a sawi.

Common programme duan mek a nih thu sawiin ZEM President chuan, "Keini chuan sum hmangin kawngpui tak tak kan siam dawn a, kawngpui hmangin sum siam kan tum ve lo. Thlai thar vanglaia a phurh velna kawngpui ṭha neih hi pawimawh kan ti. Hydel project hmanga sum siam loin, sum hmangin tui kan khuap tak tak dawn. Anticipatory bail lak ngai lo chi kawlphetha siam kan tum," a ti.

MPC president Lalhmangaiha chuan, thawhpui ṭha tak nei turin an party-in kum hnih vel kawng an dap tih a sawiin, "Thawhhona atana ke pêntute hnenah lawmthu ka sawi a ni. An ṭhahnemngaihna avangin kawng a êng a, sorkar thar hmuh ngei kan inbeisei. Tih tur erawh a la tam. Kan thawhhona kaltluang zel turin inthurualna leh zàikhata luan a pawimawh tih kan hriatreng a ngai," a ti.

ZNP president Lalduhoma chuan, kum 2018 inthlanah Pathian zarah sorkarna changin, pawl panga ni tawh loin, pakhat chiah ni tawh turtea ngaihtuahna a sèn tawh thu sawiin, "Party pahnih sual inpuansak ringawt hrawn hi a ninawm tawh," a ti a; sorkarna siam tur chuan Pathian malsawm tlaka hna thawh a ṭul thu a sawi.

ZPM-in sawichhiatna a tawh nasat nghal thu sawiin Lalduhoma chuan, "Party pahnihte hian min huphurh hle a, kan chanchin an ngaihven em em a ni. Kawng tin rengah kan fimkhur tawn a, kan intihchak tawn a pawimawh," a ti.

ZRF president H Zosiamliana chuan, lalna an chang a nih pawha mahni inhaivûr leh chhung leh khatte duhsak tura ding an nih loh thu sawiin, "Mipui sorkar ṭha tak, sorkara tel ve lote pawhin hamṭhatna an chan ve theihna tur siam tuma ding kan ni," a ti a; sorkarna siam ngei tura theihtawp an chhuah a pawimawh thu a sawi.

ZPM hian October 3, 2017 chhun dar 12 hian Chanmari YMA Hall-ah ZPM inpuan­chhuahna leh hruaitute Pathian hnena hlanna hun an hmang dawn a, tel turin Mizo mipui zawng zawngte an sawm a ni.