Ni 8 chhungin MPCB-in lirthei khu 4,599 endik

Mizoram sorkarin September 1, 2022 aṭanga Motor Vehicles (Amendment) Act, 2019 a hman hnuah Mizoram Pollution Control Board (MPCB) hnuaia lirthei khû endikna test centre-te a lûn hle a, kuminah kum 2021-a lirthei khu endik tir zawng zawng zatve velin ni riat chhungin an endiktir hman.

Vanglaini palai zawhna chhangin MPCB member secretary C Lalduhawma chuan, sorkarin lirthei khû kaihhnawiha pawisa chawi tur zat a tih pun hnuah lirthei khu endik tir an tam thu a sawi a,"January - December 2021 khan test centre paliah mi 9,748 in lirthei an endik tir a, September 1, 2022 aṭanga Motor Vehicles (Amendment) Act, 2019 hman a nih tur thu puan a nih hnuah kuminah August 22-30 chhung lekin mi 4,599 in an endik tir hman," a ti a, September thla report erawh an la lakhawm rih lo tih a sawi.

Lirtheiin khû a tihchhuah endikna leh hremna chu tun hnaia kalpui thar a nih loh thu sawiin C Lalduhawma chuan,"Kum 1989 aṭang daih tawh khan kalpui a ni tawh a, endik tir an tlem thei hle. Tun September thla aṭanga pawisa chawi tur zat Rs 1,000 aṭanga Rs 10,000-a tihpun a nih dawn khan an rawn ṭhahnem ta hluai a ni. Kum 2021 khan chawh rualin ni khatah mi 37 in an endiktir ziah ang a ni a, August 22-30, ni riat chhung erawh chuan ni khatah mi 562 in an endiktir zel anga chhut a ni," a ti.

Test centre thar hawn belh tum a nih leh nih loh zawhna chhangin C Lalduhawma chuan,"Kum 2012 aṭangin test centre-te hi MPCB hnuaiah mahni inchawm tura din an ni a, centre-te enkawl nan kum khatah Rs 8,00,000 vel hman a nih laiin Rs 5,00,000 vel bawr an lalut tlangpui. Centre-te sum lakluh aṭanga 25% hi state sorkarah kan chhung a, a bak zawng chu centre enkawl nan kan hmang," a ti.

Kumtin pawisa chawi belha an kal avangin tun dinhmunah chuan centre thar hawn belh an la tum rih loh thu a sawi a,"Tuna dan thar kalpui a nih hnu hian lirthei endik tir an tam a, pawisa pawh a lut hnem rih. Mahse, kumdang ang thoin hun rei loteah endik tir an tlem mai kan hlau a, kan la enthla rih dawn," a ti a, tun anga lirthei endik tir an tam zel chuan centre thar hawn belh pawh a la ṭul maithei niin a sawi.

C Lalduhawma chuan, Aizawlah centre pathum leh Lungleiah centre pakhat a awm thu te, kum dangah No Tolerence Week leh Traffic Police an strict chauhin test centre-te a lun ṭhin thu te, kumtluanin sorkar office hun pangngai rualin hawn a nih ṭhin thu te leh ni tam zawkah chuan test an awm mang ngai loh thute a sawi bawk.