CM leh Deputy CM-ten Lehkhabu an tlangzarh

Dr Laltluangliana Khiangte buatsaih 'Mi ngo Nukiri leh a fapa Tlira' tih lemchan lehkhabu chu September 9, 2022 khan CMO conference hall-ah chief minister Zoramthanga'n a tlangzarh. CM chuan, Mizo literature tihausa thei tur lemchan lehkhabu tlangzarh a ni chu lawmawm a tih thu leh history zir chian duhna a hrin belh zel a beisei thu a sawi.

'Aizawla motor lut hmasa ber' tih lehkhabu thar chu September 10, Inrinni khan deputy chief minister Tawnluia'n Synod Conference Centre-ah a tlangzarh. Lehkhabu hi Aizawla lirthei khalh lut hmasa bertu C Rochhinga (L) fanu Remliani Chawngthu buatsaih a ni.

Inrinni vek khan Lalzoenga lehkhabu ziah 'A thi tawh' tih chu AMC councillor Christina Roluahpuii Sailo-in MZP conference hall-ah a tlangzarh.