KHAWTHLIR
Thisen pe
Mizo Higher Secondary School NSS chuan nimin khan Civil Hospital, Aizawl Blood Bank-ah thisen unit 67 an pe. Mizoram UPC hnuaia Pathian thu zirna, Apostolic Theological Institute, Durtlang pawhin nimin khan Synod Hospital tan thisen unit 36 an pe bawk.
Power pe dawn lo
Power & Electricity department chuan vawiin chawhma dar 10 aṭanga chawhnu dar 3 inkar chhungin Sairang sub-station-ah hna an thawh dawn avangin power supply an titawp dawn. Hei vang hian hna thawh chhungin Sairang, Lungverh, Sihhmui, Léngte, Nghalchawm, Khamrang leh West Serzawl khuaahte kawlphetha pek a ni dawn lo.
Tui award dil rêl
Lunglei additional DC Donny Lalruatsanga kaihhruaiin nimin khan a pisaah Ministry of Jal Shakti hnuaia Lunglei district-a tui hna humhalh leh tihpun lama hma la ṭhate tana 4th National Water Awards dil chungchang sawiho a ni. Best district, best village panchayat, best media (print & electronic), best school, best institution for campus usage leh best NGO-ahte award dil ve ni se, an ti.
Congress zawk
Nimin Vanglaini chhuak phek 2-naa LC/VC by election result tarlana Electric Veng, Aizawla LC atana thlan tlin, MNF tia tarlan chu Congress party tih zawk tur a ni. Chhiartute hriatthiamna kan ngen e.
MNYF-in tanpui
September 20, 2022-a Martar Ni vawi 41-na thleng tur pualin MNF ṭhalaite chuan nimin khan cancer damlote inenkawlna Hospice Care Unit hnenah bubble air-mattress panga an pe. MNYF hian Martar Ni pualin thisen pek rûnpui huaihawt an tum bawk.
Hmanrua hlân
Lawngtlai DC pisain Shree Narayan Sanskritik Chetna Nyas, Noida aṭanga ṭanpuina an hmuh hmanga damdawi leh hmanrua an leite chu nimin khan bawrhsap Amol Srivastava-a'n Health & Wellness Centre 14, ASHA 40 leh UDPA department hnenah a hlân.
Thiamthil zirhona
LESDE department leh Aizawl West College-a Skill Development Cell chuan nimin khan Aizawl West College-ah 'Workshop on Skill Development and Sensitization Programme' an hmang a, LESDE director K Lalhmingliana'n a hmanpui. Zirhonaah hian kut themthiamna hmanga eizawnna chi hrang hrang inzirtir a ni.
Literacy Day
Kolasib DC John LT Sanga hoin nimin khan Kolasib Venglai Parish Hall-ah International Literacy Day hman a ni a, thupui chu ‘Transforming Literacy Learning Spaces’ tih a ni. Kumin chhungin Kolasib district-a puitling ziak leh chhiar la thiam lo 550-te ziak leh chhiar thiamtir tuma hmalak mek a nih thu tarlan a ni.
Covid-19 Special Drive neih rêl
Mamit District Task Force on Immunization chu an chairman Lalnunhlua, DC kaihhruaiin nimin khan DC conference hall-ah an ṭhukhawm a, kumin September thla chhungin Covid-19 Special Drive neih an rél.