Thla 3 chuang hnua positivity rate hniam ber ní

September 7, Nilaini khan Mizoramah Covid-19 vei mi 49 hmuh chhuah a ni a, positivity rate 11.69% niin, thla thum chuang hnua positivity rate a hniam ber ṭum a ni. Nimin khan hripui vei dam tawh mi 59 chhuahtir an ni a, Covid-19 vanga thi an awm lo.

Nilainia Covid-19 positive hmuh thar mi 49-te chu mipa 21 leh hmeichhia 28 an ni a, ZMC RT-PCR laboratory-a hmuh chhuah pakhat leh rapid antigen test hmanga hmuh 58 an ni.

Swab sample endik zat 419 aṭanga positive zat chu 11.69 niin, thla thum chuang hnua positivity rate a hniam ber ṭum a ni a; kumin June 29-a positivity rate 10.10% a nih hnua positivity rate hniam ber a ni. A záwnin ni 10 chhung positivity rate-in 20% a tling tawh lo.

Nimin khan hripui vei dam tawh mi 59 chhuahtir an ni a; district tina chhuak zat chu Aizawlah mi 23, Mamitah 13, Lungleiah 10, Saitualah paruk, Serchhipah pathum, Lawngtlai leh Hnahthialah pahnih ve ve a ni.

IDSP record angin, Mizoramah Covid-19 vei 2,37,583 hmuh chhuah a ni tawh a, mipa 1,10,651 leh hmeichhia 1,26,932 an ni a, mipa aiin hmeichhia 16,281-in an tam zawk. Nimin tlai dar 5 thleng khan mi 2,36,552 (99.57%) chhuahtir an ni tawh a, mi 722 (0.30%) thi tawhin, enkawl mek mi 309 (0.15%) an awm.

Kum 2011 chhiarpui angin, Covid-19 vei hmuh tawh 2,37,583 chu state mipui zat aṭangin 21.65% a tling a, India rama state zingah a sang ber. Mi 1,000 zelah positive 216 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.