Assam-Mizoram joint statement siamṭhat duh
Peoples Conference party acting president Vanlalruata chuan nimin khan an party pisaah thuthar thehdarhtute a kâwm a; Boundary Committee vawiin ṭhutkhawma an tel loh tur thu leh Assam-Mizoram Joint Statement siamṭhat a nih loh chuan Committee-a tel an tum tawh loh thu Boundary Committee chairman Tawnluia, deputy chief minister hnenah an hrilh tih a sawi.
Vanlalruata chuan, PC party thupui chu ‘Kan ram, kan hnam, kan sakhua a him tur a ni’ tih a nih thu sawiin, "July 26, 2021-a Assam police-te'n Vairengte dáia kan police post an rawn lâk kha inrûnnaah ngaiin kan pawmzam thei lo a, Mizoram police leh mipui ṭangrualin an la lêt kha ram chhan nana thil tihah kan ngai. August 5, 2022-a Assam-Mizoram Joint Statement-ah Assam-in Mizoram a rûn demna awm miah lo a, hemi beih lêtnaa Assam police thihna demna a awm bawk si hi kan pawm thei lo," a ti.
Joint statement pahnih siam tawhah Boundary Committee ràwn a nih loh thu te, Committee member-te'n an hriat ve loh thu leh vawiina Boundary Committee ṭhutkhawmah joint statement-te chu Committee pawmtir tum a nih thute a sawi.
Vanlalruata chuan, Boundary Committee-a statement pawm tumnaah August 9, 2022-a statement chauh tarlan a nih thu leh August 5, 2022-a statement tarlan a nih ve loh thu te, Boundary Committee whatsapp group-ah tarlang tura ngen a nih pawhin tarlan a la nih loh thu te, ram leh hnam tana thu tlàwm thlak lai ber thup chung sia Committee member-te buma statement pawmtir tumnaah an ngaih thu a sawi a; joint statement chu siamṭhat a nih loh chuan Boundary Committee-ah tel an tum tawh loh thu a sawi bawk.