100 Days Reading Campaign 2022

State Council of Educational Research and Training (SCERT) chuan nimin khan an auditorium-ah International Literacy Day pualin zirlaite thuziak dah khawmna bu, 'Take Flight: A Collection of Children’s Poems' tlangzarhna leh 100 Days Reading Campaign 2022 hawnna an buatsaih a, Human Resource Development Board vice chairman L Thangmawia, MLA-in a hmanpui.

L Thangmawia'n Take Flight: A Collection of Children’s Poems a tlangzarh a; thu sawiin, "Tunlai ṭhalaite zingah thu leh hla tuipui tak tak an awm tih ka hriatin lawmawm ka ti a, hmànlai angin naupang pawnto a rem tawh lo a, nu leh pate'n mahni fate duh ang tawkin an zirlaite pawh kan enpui ṭhat hman tawh lohna khawvelah hian SCERT-in an talent hai chhuahna hun ṭha tak a buatsaih ṭhin hi a lawmawm tak zet a ni," a ti.

School Education secretary Dr Lalzirmawia Chhangte-in 100 Days Reading Campaign bul ṭanna tur a hawng a; literature-a péng pawimawh tak poetry, suangtuahna khawvela mi chèntir theitu ni bawk hmanga intihsiak buatsaih a ni chu lawmawm a tih thu sawiin, sum leh paite lehkhabu leina atan hman uar deuh deuh a pawimawh thu a sawi.