Eye Donation Forthnight hman a ni

Eye Care Hospital, Dawrpui chuan nimin khan an hmunah National Eye Donation Forthnight vawi 37 an hman khàrna inkhawm an buatsaih a, MJA vice president Lalremsiama'n hmanpuiin, thih hnua mit pek (eye donation) lama hmalakna tur leh mipui zirtirna kawngah MJA-in tih theih a neih chuan theihtawp an lo chhuah tur thu a sawi.

Inkhawmah hian mit darthlalang pawimawhna leh a hna thawh dan hrang hrang te, Eye Bank-in eye donation an buaipui dante tarlan a ni. Kum 2008-ah Civil Hospital, Aizawlah Mizorama eye bank hmasa ber hawn a ni a, Eye Bank Association of India-ah inziah luh a ni. Mizorama mit darthlalang thlak hmasak ber chu September 25, 2009 khan tih a ni.

Tarlan danin, kum 2008 aṭanga kumin thlengin mi 938-te mit darthlalang lak a ni tawh a, thih hnua mit pe tura intiam mi 8,620 an awm tawh a, mit thlak ngai mi 362 an inziak lut tawh bawk.