Mizoram sorkarin student loan Awlsam zawk a siam lo ; MNF manifesto-ah siam tur a inti - C Lalsawivunga

Assembly session-ah Higher & Technical Education (HTE) minister Dr R Lalthangliana chuan ZPM member C Lalsawivunga zawhna chhangin, zirna sang zawk Mizoram mamawh zir duh tan awlsam zawkin student loan siam a nih loh thu a sawi. C Lalsawivunga chuan, kum 2018 MLA inthlan dawna MNF manifesto-ah student loan awlsam zawk siam a nih dawn thu tarlan a ni tih a sawi thung.

C Lalsawivunga chuan, MNF manifesto-ah, 'Zirna sang zawk Mizoram mamawh zir duh tan awlsam zawkin student loan siam a ni ang a, scholarship a nih dan tur ang taka pek a ni ang' tih a awm thu a sawi a, "An manifesto hi an hlamchhiah nge, an theihnghilh," tiin a zawt a ni.

HTE Minister chuan, MNF mani­festo-a student loan awlsam zawk siam a ni ang tih chu a dik thu sawiin, "Eng emaw chenah HTE department hi manifesto tihlawhtling tur a ni ber lo. Mizoram Youth Commission leh thil dang aṭangin ṭhalaite tan hmalak reng a ni," a ti.

MZU Southern Campus chungchanga zawhna chhangin Minister chuan, "January 17, 2020-ah Ministry of Human Resource Development (MHRD)-in MZU Vice Chancellor lehkha a rawn pe a, self financing tih a inziak lo. Ram chu state sorkarin pek ni se tih erawh a inziak," a ti a, ram chu sorkarin a pek thlap tawh thu a sawi.

HTE Minister chuan, an kut a nih angin MZU-in southern campus atan DPR an siam thu sawiin, "Cheng vbc. 400 hû vel DPR an siam a ni. Mahse, infrastructure dinna bakah, teaching leh non-teaching staff lakna tur a lo kal hlei thei lo. MHRD hotute Chief Minister nen kan biak bakah, DO letter pawh kan thawn nasa. Theihtawpin kan nawr a ni," a ti.

A tìra sawi loh self financing turin MHRD lamin an rawn tih thu sawiin Dr R Lalthangliana chuan, "Self financing tur chuan state sorkar tan a harsa rih khawp mai," a ti a; Engineering College, Pukpuia zirna ṭan tur pawhin teaching leh non-teaching staff-ah harsatna a awm thu a sawi a ni.