Leivûng paihin thlai a tihchhiat neitute Zangnadawmna pe turin NHIDCL kan ti - Chief Minister

Chief minister Zoramthanga chuan, National Highways and Infrastructure Development Corporation (NHIDCL)-te'n Mizorama kawng an laihna leivûng paihin mi huan/thlai a tihchhiatsak nasatte chu zangnadawmna pe turin an hriattir thu a sawi.

Nimina Assembly session-ah ZPM member VL Zaithanzama zawhna chhangin Chief Minister chuan, Mizorama kawngpui sial hna thawh mek Mizoram PWD-in a kalpuiah leivûng paihna tur hmun ruat bik a nih loh thu a sawi a, "Contractor leh ram neitute inbiak-remna aṭangin leivûng paihna tur ruahmanna siam ṭhin a ni," a ti.

VL Zaithanzama chuan, NHIDCL-te'n leivûng a remchanna hmun hmunah an paih tih sawiin, "Thing leh mau, nungcha leh luiin a tuar nasa hle. Chuvangin, sorkarin hrem a tum em, engtiangin nge hrem a tum? Hrem a tum loh chuan eng nge a chhan?" tiin a zawh belh.

CM Zoramthanga chuan, tun hma aṭangin leivûngte chu a rem remah paih a ni ṭhin tih sawiin, "Duhtui chhohna chu World Bank kawng laih leh ADB aṭanga hnathawh aṭangin a ni. Contractor leh kawng laihna hmuna ram neitute a paihna tur hmun remchang an zawng ṭhin. Mahse, tlang ram kan nih avangin leimin vanga chhiatna, luia lutte a awm ṭhin," a ti.

Sorkarin environment a ngai pawimawh zual a, mipui lam pawhin an ngai pawimawh zel tih sawiin Zoramthanga chuan, "Theihtawpin ṭan kan la a, Road & Infrastructure Board-te'n a hmunahte an kal chilh ṭhin," a ti a; Mizoram sorkar kuta awm ni lo NHIDCL hnathawh chu tunlaia Mizorama kawng siam hnathawh pui ber a nih thu a sawi.

Chief Minister chuan, NHIDCL-te chu an leivûng paihin huan thlai a tihchhiat nasat neitute hnenah zangnadawmna pe turin an ti niin a sawi a, "Kan nawr nasa a, a theih chin chin pek an tum. Leivûng hi a paihna tur remchang en zel a ni ang a, kan tih anga ti lo lutukte chu NHIDCL an nih pawhin an hotute hnenah kan thlen ang," a ti.