Harsatna sutkianna tur kan kalpui dawn - Congress President

Mizoram Pradesh Congress Committee (MPCC) president Lalsawta chuan, Congress party an sorkar a nih chuan mimal harsatna sutkianna tur an kalpui dawn tih a sawi a, vote lei chíngte inthiar fihlim turin a chah.

Aizawl District Congress Committee-in nimina Lal Thanhawla Auditorium-a Aizawl City Block Joint Conference an buatsaihah thu sawiin Lalsawta chuan, "Kan ram siam tur hian thil tam tak tih tur kan nei. Kan sorkar a nih chuan ram rorelna dik leh rintlak nei tur te, chhungkaw harsa zawk, mahnia dingchhuak zo lote ṭanpui nana ṭang puihna tur te, mamawh inṭâwm siam te, mimal harsatna sutkianna turte kan kalpui dawn," a ti.

Lalsawta chuan, "Ṭan la thei lo harsa lehzualte pawh Congress-in kan hlamchhiah dawn lo, an pualin ruahmanna kan siam dawn. Mizoram hi taima leh thawkrimte dinchhuahna ramah kan siam dawn a ni," a ti bawk.

Vote lei chíngte laka inthiar fihlim tura kal khawmte chahin Lalsawta chuan, "Nakkum inthlan thlirin i chhiah pek tling khawm, dik lo taka an lo chhehrelh hmangin nangmah lei tuma thlêmna i tâwk dawn. I vote lei tumtu hian lei theih thil ang lekah a ngai che a ni," a ti a; vote lei tumtute chu lo tizak tur leh tibeidawng turin an party mite a fuih a ni.

MPCC President chuan, Congress party hruaitute chu Pathian duh dana nung tura chahin, "Congress mipui hian kan sualte kan sim a, Pathian lam kan hawi a, Pathian kan auh chuan min lo ngaidam ang a, min tidam leh ang. Kan tum ber hi Pathian duh dan a nih phawt chuan Pathianin min ṭanpui ngei beisei ila a, Pathian ṭanpui tlak nih i tum ang u," a ti.

Thusawitu dang MPCC vice president Lal Thanzara chuan, Congress party chu Mizorama mi rethei zawkte tan malsawmna a lo ni tawh ṭhin tih a sawi a, "MNF-in independent an sual a, Mizo leh Mizo hial kan inthat a, ṭah leh ha ṭhialna ramah kan awm. Congress party-in kan intiamna angin remna leh muanna kan thlen a ni," a ti a; Congress sorkar hnuaiah sorkar hnathawkte an zalên a, hlawh an hmu ṭha a, ram a rálmuang ṭhin niin a sawi.

MPCC treasurer Zodintluanga Ralte pawhin thu sawiin, Congress party chu opposition-ah vawi tam tak an awm tawh a, mahse, an tho leh ṭhin tih sawiin, "A hun takah kan dingchhuak leh dawn," a ti a; "MNF-ah MLA ṭha tak tak an awm, mahse, an pu berin a zir loh avangin sum bâwihah an lut vek tawh. Congress a sorkar loh apiangin Mizoram a rûm ṭhin. MNF sorkarin a tihchhiat zawng zawng siamṭha leh turin Congress kan sorkar leh ngei ngei a ngai," a ti. ZPM party chu hmasawnna tur nei tawh lo an nih thu a sawi bawk.