Tun dinhmunah chhung tin tan Rs 3,00,000 dah a ni lo - Chief Minister

Nimina Assembly session-ah Finance changtu chief minister Zoramthanga chuan ZPM member Vanlalhlana zawhna chhangin, SEDP hnuaiah a mamawhte tan Rs 3,00,000 sem ngei tum a nih thu a sawi rualin, tun dinhmunah chhung tin tan Rs 3,00,000 dah a nih loh thu House a hrilh.

Vanlalhlana chuan, SEDP hnuaiah chhung tinte'n an mamawh huna hman turin Rs 3,00,000 dah a ni tih kha a mamawhte hnenah pek a ni ta em, pek a nih loh chuan eng nge a chhan, tiin a zawt a ni.

Chief Minister chuan, "SEDP hnuaiah a mamawhte tan cheng nuai thum hi sem ngei tum a ni. Mahse, tun dinhmunah chhung tin tan cheng nuai thum hi dah a ni lo. Budget-ah dah a nih thu pawh sawi a ni lo," a ti.

CM Zoramthanga sawi danin, SEDP hnuaiah hian kum tina dah theih chin aṭangin chhungkaw 60,000 tan Rs 50,000 ṭheuh pek tum a ni.