Assembly session a ṭiak

September 6, 2022-a ṭan Mizoram Legislative Assembly pariatna ṭhutkhawm vawi 10-na chu nimin tlai khan a ṭiak. Nimina session-ah Land Revenue & Settlement minister Lalruatkima put luh, 'The Mizoram (Land Revenue) (Amendment) Bill, 2022 pawm a ni.

Assembly speaker Lalrinliana Sailo chuan, session tluang taka a kal theihna tura thawk­tu department hrang hrangte chungah lawm­thu a sawi a, "Session neih leh hunah chuan digital uar deuh deuh a ni tawh dawn," tiin, mem­ber-te chu digital hmanga session kalpui a nih theihna atana inpuah­chah zel turin a chah.

Tun ṭum session atan hian zawhna House-a chhan chi (starred ques­tion) 188 a lut a, chung zinga 184 chu pawm niin, House-a chhan tura chhawp chhuah 60 zingah 13 chhan hman a ni. Ziaka chhan chi (unstarred question) chu 104 a lut a, pawm vek a ni.

House-ah paper 14 pharh a ni a, bill pahnih lut chu sawiho a nih hnu­ah pawm ve ve a ni bawk.