Lunglei North MLA-in kawng chhia Assembly House-ah a sawi chhuak ; Beihpui deuh takin tih kan tum - CM

Nimina Assembly session-ah Lunglei North bialtu MLA Dr Vanlalṭanpuia chuan Aizawl - Thenzawl - Lunglei (ATL) kawng a chhiat thu a sawi chhuak. PWD changtu chief minister Zoramthanga chuan, Aizawl-Lunglei kawng chu beihpui deuh taka tih an tum thu House a hrilh.

Dr Vanlalṭanpuia chuan, ATL kawng a chhe hle tih sawiin, "Engtianga siam tum nge, tun hnaiah siam tumna a awm em? Kan Chief Minister ṭhahnemngaihnain he lai kawngah hian cheng vbc. 50 chuang min hmansak tawh a, mahse, a tlo lo lutuk. Bahvya Constructions enkawl lai a tlo lo lutuk ṭhin," a ti a; Bahvya Constructions hotupa chu ṭum eng emaw zat a biak tawh thu a sawi.

Sekhum leh Haulawng inkar kawng siam chu a chhe hle nia sawiin Lunglei North MLA chuan, "Thla li a daih ngawr ngawr a ni. Kan ram pawisa a ei ral nasa tawh," a ti bawk.

CM Zoramthanga chuan, ATL kawngah a ṭha lai awm mah se, ṭhenkhat chu a hautak hle tih sawiin, "Pawisa pawh a luang lut hnem tawh. Tlawng leh Pukpui inkar hi sorkar hmasain PCC a ti a, a fuh thei lo. Keini pawhin kan ti a, a fuh chuang lo," a ti a, tih dan tur uluk taka ngaihtuah a nih thu a sawi.

ATL kawng chu Mizoram PWD-in a enkawl zingah kawng pawimawh ber lai a nih thu sawiin Zoramthanga chuan, "Fûr han zo se, beihpui deuh takin tih kan han tum ang," a ti.