Social media-a saruaka lang ṭhinte MHIP hmingin sim tura ngen an ni

MHIP, Ramlai Block chuan nimin khan Thenzawl East VC House-ah inkhawmpui an hmang a; an hun hman­puitu MHIP Gen. Hqrs. president Ngur­mawii Sailo chuan, Mizo hmeichhia social media-a saruaka inpho lang ṭhinte chu MHIP hmingin sim tura ngen an nih thu a sawi.

MHIP President chuan, tunlai khawvel hmasawnna sang zelah social media hman thiam a pawimawh thu sawiin, "Mizo hmeichhe saruak pho lante social media-ah hmuh tur a awm ta hi a pawi hle. Saruak thlalak nena social media-a inpho lang ṭhin zawng zawngte sim turin MHIP hmingin ka ngen a ni," a ti.

Khawvelin a mamawh ber chu a hminga nu ni mai lo, nutling tak tak an ni tih sawiin Ngurmawii Sailo chuan, "Nute hi chhungkaw hlimna chahbi kawltu kan ni. Khawvel siamṭha thei kan ni tih kan hriat a, hmeichhiate'n kan pawi­mawhna kan hriat thar zel a ṭul," a ti a; chhung­kua kal pêlin khawtlang a siamṭhat theih loh thu a sawi.

Ramlai Block MHIP huam chhungah hian Thenzawl khawchhunga MHIP branch-te bakah, Buangpui, Neihloh, Kanghmun South leh Zote South branch-te awmin, an vaiin branch 15 an awm a; inkhawm­puiah hian kum 2022-2024 chhunga an hruaitu turte thlan a ni.