Incentive Cash Award thar tlangzarh ; Mi 2,005 lawmpuina Rs 1,36,77,600 pe tawh

Sports & Youth Services (SYS) department chuan nimin khan 'The Mizoram Incentive Cash Award Scheme, 2022' an tlangzarh a, mi 2,005 hnenah infiammi hlawhtlingte lawmpuina Rs 1,36,77,600 pek a nih tawh thu a tarlang.

SYS department chuan, Mizoram sorkarin Mizo infiammite’n sorkar aṭanga hamṭhatna pawisa an dawn theihna 'The Mizoram Sports incentive Cash Award Rules, 2001' leh chumi ennawnna Amendment 2008 siam a ni tih an tarlang a, "Scheme hnuaiah hian Mizo infiammi tam takin hlâwkna/hamṭhatna an tél tawh a, infiammi 2,005 hnenah Rs 1,36,77,600 pek a ni tawh," a ti.

Incentive award inkaihhruaina hman lai chu kum 10 chuang hman tawh a nih thu tarlangin SYS chuan, "Event belh ngai leh sum pek tur zat bithliahte pawh a hniam deuh tawha a lan avangin dan thar, 'The Mizoram Incentive Cash Award Scheme, 2022' chu August 30, 2022-a Council of Ministers ṭhukhawm chuan a pawm ta a ni," a ti a; scheme tharah hian national leh international-a medal late tana sum hmuh tur zat tihsan a nih thu a tarlang.

SYS DEPARTMENT TARLAN ṬHENKHAT
1) International event-ah participation prize belh a ni.
2) India ram state dangte leh hmarchhak state dangte tih dan nen uluk taka khaikhin hnuah rate thar siam a ni.
3) Mizoram State Games pawh dan tharah hian lawmman dawn theihna turin belh a ni.
4) The Mizoram Incentive Cash Award Scheme, 2022 hi khawvel leh India rama intihsiakna hrang hranga Mizo hlawhtlinna chang, ram tihmingṭhatute tihphûrna leh sorkarin a chawimawi lêt ve theihna a ni.
5) Mizo ṭhalai, hmabak êng tak neite tana chona petu leh fuihtu a nih beiseia siam a ni.